Xitoyda “Maysak” tropik bo‘roni oqibatida 39 kishi halok bo‘ldi
Hududlarda yog‘ingarchilik miqdori 90 santimetrgacha yetgan.
Xitoyning janubiy hududlarida kuzatilgan “Maysak” tropik bo‘roni sabab yuzaga kelgan kuchli toshqinlar oqibatida 39 kishi halok bo‘ldi. Qurbonlarning 26 nafari Guangsi avtonom rayonining Nannin shahrida qayd etilgan. Bu haqda Sinxua axborot agentligi xabar berdi.
Mahalliy hokimiyat ma’lumotlariga ko‘ra, kuchli yog‘ingarchilik natijasida to‘g‘onlardan biri yorilib ketgan. 8 mingdan ortiq mutaxassis, qariyb 5 700 ta qayiq va dronlar ichimlik suvi hamda boshqa zarur yordam vositalarini yetkazish, shuningdek, suv toshqini oqibatida qamalib qolgan aholini xavfsiz hududlarga olib chiqish uchun qutqaruv operatsiyalariga jalb etilgan va 130 mingga yaqin kishi evakuatsiya qilindi.
Hengjoudagi bir necha shahar va qishloqlarda chiqindilarni tozalash hamda hududlarni dezinfeksiya qilish, yo‘llarni ta’mirlash ishlari ham olib borilmoqda. Hozirga qadar 60 mingdan ortiq xonadonning elektr ta’minoti qayta tiklangan.
Toshqin oqibatida Guansi provinsiyasidagi Guigan hayvonot bog‘i ham zarar ko‘rganligi ma’lum qilingan. Suv toshqini hayvonlar saqlanadigan joylarga shikast yetkazgani sabab kamida 100 ta hayvon qochib ketgan. Xitoy Milliy meteorologiya markazi ma’lumotiga ko‘ra, hududning ayrim qismlarida yog‘ingarchilik miqdori 10–40 santimetrni tashkil etgan bo‘lsa, eng ko‘p zarar ko‘rgan hududlarda bu ko‘rsatkich 90 santimetrgacha yetgan. Sinoptiklar yaqin kunlarda yana kuchli yomg‘irlar davom etishi mumkinligini ma’lum qilgan.
