Davlat raqamini yashirib harakatlangan "Matiz" haydovchisiga qonuniy chora ko‘rildi

Ijtimoiy tarmoqlarda "Matiz" avtomobili haydovchisi va yo‘l-patrul xizmati (YPX) xodimi o‘rtasidagi tortishuv aks etgan video keng muhokamalarga sabab bo‘ldi. Holat yuzasidan Yo‘l harakati xavfsizligi xizmati (YHXX) rasmiy munosabat bildirdi.

 

YHXX ma’lumotiga ko‘ra, videoda aks etgan haydovchi bundan avval ham davlat raqam belgisining bir qismini yopib harakatlangani uchun aynan shu YPX xodimi tomonidan ogohlantirilgan. Biroq u qoidabuzarlikni takrorlagan.

 

Haydovchining o‘zi ham avval davlat raqam belgisining bir qismini skotch bilan, keyinchalik esa qora material bilan yopib harakatlanganini tasdiqladi. Uning aytishicha, ijtimoiy tarmoqqa joylagan videosi hissiyotga berilib yozilgan bo‘lib, ichki ishlar organlari xodimlariga nisbatan e’tiroz bildirishni maqsad qilmagan.

 

"Ular qonuniy chora ko‘rishdi. Bu ishimiz noto‘g‘ri ekanini bilardim", dedi haydovchi.

 

YHXXning bildirishicha, haydovchi ogohlantirilganiga qaramay qoidabuzarlikni takror sodir etgani sababli unga nisbatan Ma’muriy javobgarlik to‘g‘risidagi kodeksning 127-moddasi asosida ma’muriy bayonnoma rasmiylashtirilgan. Shuningdek, transport vositasi vaqtincha saqlash uchun jarima maydoniga joylashtirilgan.

 

Yo‘l harakati xavfsizligi xizmati haydovchilarni yo‘l harakati qoidalariga qat’iy rioya qilishga, davlat raqam belgilarini yashirgan holda transport vositasini boshqarmaslikka chaqirdi. Idora "Xavfsiz va sog‘lom yurt" tezkor-profilaktik tadbirlari davom etayotganini ham eslatdi.