Toshkentda ofisdan 880 mln so‘m o‘g‘irlagan shaxs qo‘lga olindi
O‘g‘irlangan pullar uning yashash xonadonidan topilgan.
Toshkent shahrining Yunusobod tumanida joylashgan ofislardan biridan 880 million so‘m o‘g‘irlaganlikda gumon qilingan shaxs qo‘lga olindi. Bu haqda Toshkent shahar Ichki ishlar bosh boshqarmasi ma’lum qildi.
Ma’lumotlarga ko‘ra, Yunusobod tumanidagi Markaz-5 dahasida yashovchi fuqaro ichki ishlar organlariga murojaat qilib, ofisdagi pullari o‘g‘irlanganini bildirgan. Olib borilgan tezkor-qidiruv tadbirlari natijasida jinoyatni sodir etganlikda gumon qilingan shaxs aniqlanib, qo‘lga olingan.
Gumonlanuvchining yashash xonadoni ko‘zdan kechirilganda o‘g‘irlangan pullar topilib, ashyoviy dalil sifatida rasmiylashtirib olingan. Toshkent shahar IIBB tomonidan e’lon qilingan videoda gumonlanuvchi qilgan ishidan pushaymon ekanini bildirgan.
Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilgan. Gumonlanuvchiga nisbatan qamoqqa olish ehtiyot chorasi qo‘llanilgan.
