Yevropada jazirama sabab 10 mingdan ortiq odam vafot etdi

 

Yevropada iyun oyi oxirida kuzatilgan anomal issiq to‘lqini oqibatida 10 mingdan ortiq odam vafot etdi. Bu haqda Yevropa Kasalliklarning oldini olish va nazorat qilish markazi (ECDC) hamda Jahon sog‘liqni saqlash tashkiloti (JSST) ko‘magida faoliyat yurituvchi EuroMOMO monitoring dasturi ma’lum qildi.

 

Hisobotga ko‘ra, issiq bilan bog‘liq o‘limlarning 9 mingdan ortig‘i 65 yosh va undan katta fuqarolar hissasiga to‘g‘ri kelgan. Mutaxassislar ta’kidlashicha, yuqori harorat nafaqat issiq urishiga, balki yurak-qon tomir hamda nafas yo‘llari kasalliklarining og‘irlashishiga ham sabab bo‘ladi. Ayniqsa, keksa yoshdagilar bunday ob-havo sharoitida eng xavfli guruh hisoblanadi.

 

Tadqiqot davomida Yevropaning 27 davlati milliy statistikasi tahlil qilingan. Hisobotda mamlakatlar kesimida batafsil raqamlar keltirilmagan bo‘lsa-da, iyun oyining so‘nggi haftasida Fransiya va Belgiyada o‘ta yuqori ortiqcha o‘lim ko‘rsatkichlari qayd etilgani ma’lum qilingan.

 

Germaniyaning Robert Kox instituti ma’lumotlariga ko‘ra, iyun oyi oxiriga kelib mamlakatda jazirama sabab taxminan 5 100 kishi vafot etgan. Shundan 4 310 nafari 22–28-iyun kunlari kuzatilgan eng issiq hafta hissasiga to‘g‘ri keladi.

 

Buyuk Britaniyadagi London Imperial kolleji tadqiqotiga ko‘ra esa, iyun oyining oxirida birgina Angliya va Uelsda qariyb 2 700 kishi issiq to‘lqini oqibatida hayotdan ko‘z yumgan.

 

Shuningdek, ushbu ilmiy guruh hisob-kitoblariga ko‘ra, anomal issiq Yevropaning 12 ta yirik shahrida qariyb 2 300 kishining o‘limiga sabab bo‘lgan. Issiq tufayli eng ko‘p o‘lim holatlari Milan, Parij va Barselona shaharlarida qayd etilgan.