Qarshida sobiq MFY raisi fuqarolar nomiga qariyb 200 mln so‘mlik kredit rasmiylashtirgani aniqlandi
Sobiq rais va uning o‘g‘li olti nafar fuqaroning pasport ma’lumotlaridan foydalanib, ularning imzolarini soxtalashtirgan va onlayn savdo do‘konlaridan kredit evaziga maishiy texnika olgan.
Bosh prokuratura huzuridagi Departamentning Qarshi tumani bo‘limi tomonidan o‘tkazilgan tergovga qadar tekshiruvda Qarshi tumanidagi “Yangi Xonobod” mahalla fuqarolar yig‘inining sobiq raisi K.R. va uning o‘g‘li I.N. tomonidan firibgarlik sodir etilgani aniqlandi.
Ma’lum bo‘lishicha, ular mahallaga turli masalalar bilan murojaat qilgan olti nafar fuqaroning pasport ma’lumotlaridan foydalanib, ularning imzolarini qalbakilashtirgan. Shundan so‘ng onlayn savdo do‘konlari orqali fuqarolar nomiga kredit evaziga maishiy texnikalar xarid qilgan.
Tergovga ko‘ra, xarid qilingan texnikalar keyinchalik naqd pulga sotilib, jami 187,4 mln so‘mlik kredit mablag‘lari gumonlanuvchilarning shaxsiy ehtiyojlari uchun sarflangan.
Mazkur holat yuzasidan Jinoyat kodeksining 168-moddasi (firibgarlik) hamda 228-moddasi (hujjatlarni qalbakilashtirish va ulardan foydalanish) bilan jinoyat ishi qo‘zg‘atilib, tergov harakatlari olib borilmoqda.
