Apple yana dunyodagi eng qimmat kompaniyaga aylandi

Apple sun’iy intellekt bozoridagi o‘zgarishlar fonida Nvidia’ni ortda qoldirib, dunyodagi eng qimmat kompaniyaga aylandi.

 

Kompaniyaning bozor qiymati 4,88 trillion dollarga yetgan bo‘lsa, Nvidia’ning bozor kapitallashuvi 3,5 foizga kamayib, 4,86 trillion dollarni tashkil etdi. Shu tariqa, Apple bir yildan ortiq vaqtdan so‘ng yana dunyodagi eng qimmat kompaniya maqomini qo‘lga kiritdi.

 

Nvidia avvalroq bozor qiymati 5 trillion dollardan oshgach, ushbu reytingda birinchi o‘ringa chiqqan edi. O‘tgan oy Apple sun’iy intellekt asosida ishlovchi Siri yordamchisining yangilangan versiyasini taqdim etdi. 

 

Yangi tizim foydalanuvchilarning so‘rovlarini shaxsiy kontekstni hisobga olgan holda yaxshiroq tushunishi, internetdan real vaqt rejimida ma’lumot olishi hamda murakkabroq vazifalarni bajarishi bilan ajralib turadi.

 

Founder ETFs asoschisi Maykl Monaganning fikricha, investorlar endilikda sun’iy intellekt infratuzilmasiga katta mablag‘ sarflayotgan kompaniyalardan ko‘ra, ushbu texnologiyani foydalanuvchilar uchun amaliy xizmatlarga aylantira oladigan kompaniyalarga ko‘proq e’tibor qaratmoqda. Uning ta’kidlashicha, Apple’ning AI yo‘nalishidagi nisbatan kam kapital xarajatlari endi kompaniya uchun ustunlik sifatida baholanmoqda.

 

Apple aksiyalarining o‘sishi kompaniyaning 30-iyul kuni e’lon qilinadigan uchinchi chorak moliyaviy natijalari arafasida kuzatilmoqda. Avvalroq kompaniya savdo hajmi 14–17 foizga o‘sishini prognoz qilgan edi.

 

Shu bilan birga, Apple bosh direktori Tim Kuk sentabr oyida kompaniya rahbarligini 2021-yildan buyon apparat muhandisligi bo‘limini boshqarib kelayotgan Jon Ternusga topshirishi kutilmoqda.

 

Ayni paytda yarimo‘tkazgichlar bozorida raqobat kuchaymoqda. Micron kompaniyasi may oyida bozor qiymatini 1 trillion dollardan oshirgan bo‘lsa, Janubiy Koreyaning SK Hynix kompaniyasi Nasdaq birjasida ro‘yxatdan o‘tdi.

 

Apple aksiyalarining o‘sishiga qaramay, AQSH fond bozori indekslari pasaydi. Savdolar davomida Nasdaq 1,6 foizga, S&P 500 0,9 foizga, Dow Jones Industrial Average esa 0,25 foizga tushdi.