Soxta my.gov.uz sayti orqali 1 mlrd so‘mdan ortiq mablag‘ni o‘zlashtirgan jinoiy guruh ushlandi

Ichki ishlar vazirligi Kiberjinoyatlarga qarshi kurashish departamenti Yagona interaktiv davlat xizmatlari portali — my.gov.uz saytini soxtalashtirib, fuqarolarning bank kartalaridagi mablag‘larni o‘zlashtirish bilan shug‘ullangan jinoiy guruh fosh etilganini ma’lum qildi.

 

Tergov ma’lumotlariga ko‘ra, jinoiy sxemani 1993-yilda Xorazm viloyatida tug‘ilgan shaxs tashkil qilgan. U va uning sheriklari my.gov.uz platformasiga o‘xshash soxta sayt yaratib, Instagram orqali “Kompensatsiya rasmiylashtirish markazi” nomi ostida yolg‘on reklama tarqatgan.

 

Firibgarlar fuqarolarni soxta saytga yo‘naltirib, ulardan anketa to‘ldirish va bank kartasi ma’lumotlarini kiritishni talab qilgan. Natijada foydalanuvchilarning karta rekvizitlari qo‘lga kiritilib, hisobidagi mablag‘lar yechib olingan.

 

IIV ma’lumotiga ko‘ra, jinoyatni uyushgan jinoiy guruh sodir etgan bo‘lib, uning faoliyatiga 2002- va 2006-yilda tug‘ilgan shaxslar ham jalb qilingan.

 

Surishtiruv davomida guruh 26 nafar fuqaro nomiga rasmiylashtirilgan 293 ta bank kartasi — "drop" kartalardan foydalangani aniqlangan. O‘g‘irlangan mablag‘lar avval ushbu kartalarga o‘tkazilib, so‘ng Telegram messenjeridagi maxsus kriptobotlar orqali kriptoaktivlarga aylantirilgan.

 

Tergov davomida jinoiy guruh respublika bo‘ylab 456 nafar fuqarodan 1 milliard so‘mdan ortiq mablag‘ni o‘zlashtirgani aniqlangan. Guruh faoliyatiga Andijon viloyati IIB Kiberjinoyatlarga qarshi kurashish boshqarmasi xodimlari tomonidan o‘tkazilgan tezkor tadbirlar davomida chek qo‘yilgan.

 

Mazkur holat yuzasidan Jinoyat kodeksining 168-moddasi (firibgarlik) hamda 278-6-moddasi bilan jinoyat ishi qo‘zg‘atilgan. Hozirda tergov harakatlari davom etmoqda.