Livan prezidenti Tramp bilan Isroil bo‘yicha muzokaralar uchun AQSHga yo‘l oldi

Livan prezidenti Jozef Aun AQSH prezidenti Donald Trampning taklifiga binoan Vashingtonga jo‘nab ketdi. Bu haqda Al Jazeera xabar berdi.

 

Ma’lum qilinishicha, Aun kelasi hafta Oq uyda Donald Tramp va AQSHning yuqori martabali rasmiylari bilan uchrashadi. Muzokaralarda Isroil va "Hizbulloh" o‘rtasidagi o‘t ochishni to‘xtatish rejimini mustahkamlash, Isroil qo‘shinlarini Livan janubidan olib chiqish hamda mamlakatda xavfsizlik va barqarorlikni tiklash masalalari muhokama qilinadi.

 

Shuningdek, tomonlar Livan hukumatining mamlakatning barcha hududlari ustidan nazoratini kuchaytirish masalasini ham ko‘rib chiqishi kutilmoqda.

 

Tashrif Livan va Isroil vakillari AQSH vositachiligida Rimda navbatdagi muzokaralarni o‘tkazganidan bir necha kun o‘tib amalga oshirilmoqda. AQSH rasmiylariga ko‘ra, tomonlar Livan janubida Isroil qo‘shinlari bosqichma-bosqich chekinadigan va ularning o‘rnini Livan armiyasi egallaydigan "sinov zonalari"ni tashkil etish bo‘yicha keyingi qadamlar yuzasidan kelishuvga erishgan.

 

Shu bilan birga, muzokaralar davom etayotganiga qaramay, Isroil armiyasi Livan janubidagi o‘zi "xavfsizlik zonasi" deb atayotgan hududda qolmoqda va havo hujumlarini davom ettirmoqda. Isroil tomoni qo‘shinlar "Hizbulloh" qurolsizlanmaguncha hududni tark etmasligini bildirgan. "Hizbulloh" esa qurolsizlanish talabini va amaldagi kelishuvni rad etmoqda.

 

Livan Sog‘liqni saqlash vazirligi ma’lumotiga ko‘ra, mart oyidan buyon Isroilning Livandagi harbiy amaliyotlari oqibatida 4 mingdan ortiq kishi halok bo‘lgan, bir milliondan ziyod aholi o‘z uyini tark etishga majbur bo‘lgan.