Hindiston va Pokiston chegarasida ikki soatlik otishma yuz berdi
Hindiston harbiylari chegarani noqonuniy kesib o‘tishga uringan "terrorchilar"ni to‘xtatishga uringan.
Hindiston va Pokiston o‘rtasidagi nazorat chizig‘ida (Line of Control) joylashgan Jammu va Kashmirning Rajauri sektorida ikki soat davom etgan qurolli to‘qnashuv sodir bo‘ldi. Bu haqda NDTV telekanaliga tayanib RIA Novosti xabar berdi.
Ma’lum qilinishicha, Hindiston harbiylari chegarani noqonuniy kesib o‘tishga uringan "terrorchilar"ni to‘xtatishga uringan. Natijada tomonlar o‘rtasida taxminan ikki soat davom etgan shiddatli otishma yuz bergan.
NDTV qayd etishicha, bu 2025-yil may oyida Hindistonning "Sindur" harbiy operatsiyasi yakunlanganidan buyon o‘t ochishni to‘xtatish rejimi buzilishi bilan bog‘liq ilk yirik hodisa hisoblanadi. Shunga qaramay, o‘tgan davr mobaynida chegarada kichik ko‘lamdagi otishmalar bir necha bor kuzatilgan.
Eslatib o‘tamiz, Hindiston va Pokiston o‘rtasidagi keskinlik 2025-yil aprel oyida Jammu va Kashmirning Pahalgam shahri yaqinida sodir etilgan teraktdan so‘ng yana kuchaygan edi. Shundan so‘ng Hindiston "Sindur" operatsiyasini boshlab, Pokiston hududidagi "terrorchilik infratuzilmasi"ga zarbalar bergan.
Operatsiya boshlanganidan to‘rt kun o‘tib, tomonlar harbiy harakatlarni to‘xtatish bo‘yicha kelishuvga erishgan. Biroq 2026-yil may oyida Hindiston Quruqlik qo‘shinlari shtabi boshlig‘i Upendra Dvivedi zarurat tug‘ilsa, "Sindur 2.0" operatsiyasini o‘tkazishga tayyorgarlik ko‘rilayotganini ma’lum qilgan.
