Turkiyada o‘zbekistonlik ayol uchinchi qavatdan tushib ketdi
Bursa shahridagi o‘zbekistonlik ko‘ngillilar ayolning davolanishi va sog‘ayishiga ko‘maklashdi. Shundan so‘ng u O‘zbekistonga qaytarildi.
Turkiyaning Bursa shahrida baxtsiz hodisaga uchragan O‘zbekiston fuqarosi Z.N. O‘zbekistonning Istanbul shahridagi Bosh konsulxonasi hamda Migratsiya agentligi hamkorligida vatanga qaytarildi.
Ma’lum qilinishicha, fuqaro ishlash maqsadida Bursaga borgan vaqtida uchinchi qavatdan yiqilib, og‘ir tan jarohati olgan. U zudlik bilan shoshilinch tibbiy yordam orqali shifoxonaga yotqizilgan.
Hodisadan xabar topgan Bursa shahridagi o‘zbekistonlik ko‘ngillilar jabrlanuvchining davolanishi va sog‘ayishiga ko‘maklashish maqsadida navbatchilik tashkil etgan.
Shundan so‘ng O‘zbekistonning Istanbuldagi Bosh konsulxonasi hamda O‘zbekiston Respublikasi Vazirlar Mahkamasi huzuridagi Migratsiya agentligi hamkorligida fuqaro Turkiyadan O‘zbekistonga muvaffaqiyatli olib kelindi.
Shuningdek, rasmiylar jabrlanuvchiga beg‘araz yordam ko‘rsatgan Bursa shahridagi ko‘ngilli vatandoshlar hamda “O‘zbek xotin-qizlarining huquqlarini himoya qilish jamiyati”ga minnatdorlik bildirdi.
