Kongo DRda Ebola virusi qurbonlari soni 930 nafardan oshdi

Kongo Demokratik Respublikasida (KDR) Ebola epidemiyasi tobora kuchayib bormoqda, deya xabar bermoqda Al Jazeera.

 

Mamlakat Sog‘liqni saqlash vazirligi ma’lumotlariga ko‘ra, virus oqibatida vafot etganlar soni kamida 930 nafarga yetgan, tasdiqlangan kasallanish holatlari esa 2 344 tani tashkil etmoqda.

 

Qayd etilishicha, faqat juma kunidan keyingi 24 soat ichida 37 nafar bemor vafot etgan. Bu epidemiya 15 may kuni rasman e’lon qilinganidan buyon kuzatilgan eng yuqori kunlik o‘lim ko‘rsatkichlaridan biri hisoblanadi.

 

Jahon sog‘liqni saqlash tashkiloti (JSST) Ebola Kngo DRda avvalgi epidemiyalarga qaraganda tezroq tarqalayotganidan ogohlantirdi. Tashkilot bosh direktori Tedros Adanom Gebreyesusning ta’kidlashicha, 2018–2020 yillardagi Ebola epidemiyasida tasdiqlangan holatlar soni 2 ming nafarga yetishi uchun 10 oydan ortiq vaqt ketgan bo‘lsa, bu safar mazkur ko‘rsatkich atigi ikki oy ichida qayd etildi. JSST haqiqiy kasallanganlar soni rasmiy statistikadan kamida ikki barobar ko‘p bo‘lishi mumkinligini bildirdi.

 

Tedrosning so‘zlariga ko‘ra, ushbu epidemiya tarixdagi uchinchi eng yirik Ebola avj olishi bo‘lib, so‘nggi bir oy ichida tarqalish sur’ati avvalgi barcha epidemiyalardan yuqori bo‘lgan.

 

Kongo DRdagi 17-Ebola epidemiyasi mamlakatning shimoli-sharqidagi Ituri provinsiyasida bir necha kishining vafotidan so‘ng aniqlangan. Hozirgacha virus mamlakatning beshta viloyatida hamda qo‘shni Ugandada qayd etilgan. Biroq JSST ma’lumotiga ko‘ra, Uganda deyarli Ebola virusidan xoli hududga aylangan bir paytda, Kongo DRda kasallik misli ko‘rilmagan tezlikda tarqalmoqda.

 

Vaziyatni murakkablashtirayotgan omillardan yana biri Ituri provinsiyasidagi tibbiyot xodimlarining ish tashlashidir. Ular epidemiya boshlanganidan buyon xavfli sharoitlarda ishlayotganiga qaramay, mehnatiga haq to‘lanmaganini bildirib, Bunia umumiy shifoxonasiga kirishni to‘sib qo‘ygan.

 

JSST ma’lumotiga ko‘ra, yangi aniqlanayotgan holatlarning 80 foizdan ortig‘i ilgari kuzatuvga olingan kontaktlar ro‘yxatidan tashqarida aniqlanmoqda. Bu esa virusning yuqish zanjirlari hali ham to‘liq aniqlanmayotganini ko‘rsatmoqda.

 

Kongo DR Sog‘liqni saqlash vazirligi ma’lumotiga ko‘ra, ayni paytda 724 nafar bemor shifoxonalarda izolyatsiyada davolanmoqda. So‘nggi 24 soat ichida yana 22 nafar bemor sog‘aygani qayd etilgan, epidemiya o‘choqlarida esa kasallik tarqalishini jilovlash bo‘yicha choralar kuchaytirilmoqda.