Rossiyada migrantlarni deportatsiya qilish asoslari kengaytirildi

 

Rossiya Davlat Dumasi chet el fuqarolarini deportatsiya qilish uchun asos bo‘ladigan ma’muriy huquqbuzarliklar ro‘yxatini kengaytiruvchi qonunni ikkinchi va uchinchi o‘qishda qabul qildi.

 

Yangi qonunga muvofiq, deportatsiya qo‘llanilishi mumkin bo‘lgan Ma’muriy javobgarlik to‘g‘risidagi kodeks moddalari soni 22 tadan 45 taga yetkazildi.

 

Endilikda quyidagi huquqbuzarliklar ham deportatsiya uchun asos bo‘lishi mumkin:

• millat, din yoki jinsga ko‘ra kamsitish;

• huquqni muhofaza qiluvchi organlar xodimlarining qonuniy talablariga bo‘ysunmaslik;

• mayda bezorilik;

• miting va ommaviy tadbirlar qoidalarini buzish;

• yo‘llarni to‘sib qo‘yish;

• giyohvand moddalarni iste’mol qilish;

• taqiqlangan ramzlarni targ‘ib qilish;

• Rossiya Qurolli kuchlari obro‘siga putur yetkazish;

• Rossiyaga nisbatan sanksiyalar joriy etishga chaqiriqlar.

 

Shuningdek, xorijiy agentlar faoliyati qoidalarini buzish, favqulodda holat rejimini buzish hamda nomaqbul deb topilgan tashkilotlar faoliyatida ishtirok etish ham deportatsiya uchun asoslar qatoriga kiritilgan.

 

Qonun bilan birga, mamlakatga kirish qoidalarini buzish va noqonuniy mehnat faoliyati uchun belgilangan jarimalar ham oshirilmoqda. Minimal jarima miqdori 2 ming rubldan 4 ming rublgacha ko‘tariladi.

 

Bundan tashqari, qonunga ko‘ra, ma’muriy huquqbuzarlik sodir etgan chet el fuqarolari endilikda deportatsiyadan qochish uchun oilaviy ahvoli yoki Rossiyada uzoq muddat yashaganini asos sifatida ko‘rsata olmaydi.

 

Davlat Dumasi, shuningdek, har qanday sudlanganlik holatiga ega bo‘lgan chet el fuqarolariga Rossiya fuqaroligi, yashash guvohnomasi yoki vaqtinchalik yashash ruxsatnomasini berishni taqiqlovchi qonunni ham qabul qildi. Mazkur cheklov qochqinlar va siyosiy boshpana olgan shaxslarga tatbiq etilmaydi.

 

Qonun rasmiy e’lon qilinganidan 90 kun o‘tib kuchga kiradi.