AQSH Rossiyaga bosimni kuchaytirmoqda: Tramp 100 foizgacha boj tariflarini nazarda tutuvchi qonunni imzoladi
AQSH Rossiyaga bosimni kuchaytirmoqda: Tramp 100 foizgacha boj tariflarini nazarda tutuvchi qonunni imzoladi
AQSH prezidenti Donald Tramp Ukrainadagi urush sabab Rossiyaga qarshi keng qamrovli sanksiyalar paketini nazarda tutuvchi qonunni imzoladi.
Juma kuni imzolangan qonun Rossiya prezidenti Vladimir Putin, yuqori martabali amaldorlar va oligarxlar, shuningdek, Rossiya banklari va moliya institutlariga qarshi sanksiyalarni nazarda tutadi.
Shuningdek, Moskvaning energetika va mudofaa tarmoqlari hamda Rossiya neftini G‘arb sanksiyalarini chetlab o‘tgan holda tashishda foydalanilayotgan tankerlarning «soya floti» ham cheklovlarga tushadi.
Qonunning muhim bandlaridan biriga ko‘ra, Tramp Rossiya nefti va gazining beshta eng yirik xaridoriga 100 foizgacha boj tariflarini joriy etish vakolatiga ega bo‘ladi. Ushbu chora Rossiya xom neftining eng yirik importchilari bo‘lgan Xitoy va Hindistonga sezilarli ta’sir ko‘rsatishi mumkin.
Qonun, shuningdek, Eronning energetika va qurol-yarog‘ tarmoqlariga qarshi sanksiyalarni kengaytiradi.
Hujjat Senatda o‘tgan oy, Vakillar palatasida esa chorshanba kuni ma’qullangan. Vakillar palatasida 58 nafar demokrat qonun loyihasini qo‘llab-quvvatlagan.
Qonun tarafdorlari sanksiyalar Kremlning urushni moliyalashtirish imkoniyatlarini cheklashi va Rossiyani muzokaralarga undashi mumkinligini ta’kidlamoqda. Ukraina prezidenti Volodimir Zelenskiy hujjatni «nihoyatda kuchli vosita» deb atagan.
Biroq Vakillar palatasidagi Demokratik ozchilik yetakchisi Hakim Jefrays qonunga qarshi chiqdi. Uning ta’kidlashicha, yangi tarif vakolatlari AQSHdagi oilalar xarajatlarini oshirishi mumkin. U sanksiyalar bilan bog‘liq qoidalarda «ko‘plab bo‘shliqlar» mavjudligini ham bildirgan.
Hindiston esa yangi tariflar tahdidiga qaramay, 1,4 milliard aholisi uchun energiya xavfsizligini ta’minlashga qat’iy sodiqligini ma’lum qilgan.
Trampning qonunni imzolashi Xitoy prezidenti Si Szinpinning Oq uyga tashrifidan taxminan bir hafta oldin sodir bo‘ldi.
