Moskvadagi neftni qayta ishlash zavodiga zarba berildi: qurbonlar bor
Moskva meri hujumlar parlament saylovlarini izdan chiqarishga qaratilganini aytdi.
Ukrainaning Moskva viloyatiga uyushtirgan yirik dron hujumlari oqibatida ikki kishi halok bo‘ldi. Moskvadagi neftni qayta ishlash zavodi ham dronlar nishoniga aylangan. Bu haqda Rossiya rasmiylariga tayanib, Reuters xabar berdi.
Moskva meri Sergey Sobyaninning aytishicha, shanba kunidan buyon Rossiya hududida 1600 dan ortiq dron urib tushirilgan. Shundan 450 tasi Moskva tomon yo‘nalgan.
Uning so‘zlariga ko‘ra, bir nechta dron neftni qayta ishlash zavodi hududiga yetib kelgan, ulardan biri turar joy binosiga urilgan. Moskvada qurbonlar yo‘qligi aytilmoqda.
Reuters muxbirlari Moskva shahrida portlashlar ovozini eshitgan va neftni qayta ishlash zavodi hududidan tutun ko‘tarilganini ko‘rgan. Zavodga yetkazilgan zararning ko‘lami hozircha ma’lum emas.
Moskva viloyatining Ramenskoye tumanida 21 qavatli turar joy binosidan 400 kishi, jumladan, 70 nafar bola evakuatsiya qilingan. Bir qator uylar zarar ko‘rgan.
Ukraina hujumlar yuzasidan hozircha izoh bermagan. Rossiya va Ukraina tomoni tinch aholini nishonga olmasligini ta’kidlab keladi.
Hujumlar Rossiyada parlament saylovlarining so‘nggi kunida sodir bo‘lgan. Moskva meri Sergey Sobyanin hujum saylovlarni izdan chiqarish maqsadida rejalashtirilganini aytdi. Biroq bu bayonot Ukraina tomonidan tasdiqlanmagan.
Ma’lumotlarga ko‘ra, Moskva neftni qayta ishlash zavodi 2024-yilda 11,6 mln tonna neftni qayta ishlagan. Undan 2,9 mln tonna benzin va 3,2 mln tonna dizel yoqilg‘isi ishlab chiqarilgan.
