Oʻzbekistonda xizmat koʻrsatgan artist Nasiba Madrahimova 80 yoshida vafot etdi
“Bahor” davlat raqs ansamblining yetakchi raqqosalaridan biri boʻlgan sanʼatkor uzoq yillar milliy raqs sanʼati rivojiga munosib hissa qoʻshgan.
Mukarram Turgʻunboyeva nomidagi mashhur “Bahor” davlat raqs ansamblining yetakchi raqqosalaridan biri, Oʻzbekistonda xizmat koʻrsatgan artist Nasiba Madrahimova 23-iyul kuni 80 yoshida vafot etdi. Bu haqda sanʼat arbobi Nasriddin Asriddinov maʼlum qildi.
Nasiba Madrahimova oʻzbek milliy raqs sanʼati maktabining yorqin namoyandalaridan biri boʻlib, uzoq yillar davomida “Bahor” ansambli safida samarali ijod qildi. U nafaqat sahnadagi mahorati, balki koʻplab yosh raqqosalarga milliy raqs sanʼati sirlarini oʻrgatgan tajribali ustoz sifatida ham eʼtirof etilgan.
Sanʼatkorning milliy madaniyat va sanʼat rivojiga qoʻshgan munosib hissasi eʼtirof etilib, 1981-yilda unga “Oʻzbekistonda xizmat koʻrsatgan artist” faxriy unvoni berilgan.
