Suriyada ikkita avtobus to‘qnashdi, 35 kishi halok bo‘ldi
Dayr az-Zor–Damashq avtomobil yo‘lida sodir bo‘lgan YTHda yana 30 kishi turli darajadagi tan jarohati oldi.
Suriyaning Dayr az-Zor–Damashq avtomagistralida 25-iyul kuni sodir bo‘lgan yirik yo‘l-transport hodisasi oqibatida 35 kishi halok bo‘ldi, 30 kishi jarohatlandi.
SANA agentligi xabariga ko‘ra, avariya As-Suxna va Palmira shaharlari oralig‘ida ikki avtobusning to‘qnashuvi natijasida yuz bergan.
Hodisadan so‘ng Suriya Mudofaa vazirligi jabrlanganlar va halok bo‘lganlarni Homs harbiy shifoxonasiga yetkazish uchun tibbiy evakuatsiyaga bir nechta vertolyotni jalb qildi.
Ichki ishlar vazirligi tez yordam brigadalari va tegishli xizmatlar zudlik bilan voqea joyiga yetib borganini, jabrlanganlarni shifoxonalarga olib borish hamda halok bo‘lganlarni evakuatsiya qilish ishlari davom etayotganini ma’lum qildi.
Sog‘liqni saqlash vazirligi Tez tibbiy yordam va shoshilinch tibbiy xizmatlar boshqarmasi direktori Najib al-Naasanning bildirishicha, ayni paytda avariya oqibatida 35 kishi halok bo‘lgan, 30 kishi esa jarohatlangan.
Shuningdek, Suriya Fuqaro mudofaasi xizmati Palmiradagi qutqaruv guruhlarini hodisa joyiga yuborgan, Dayr az-Zordagi bo‘linmalardan esa qo‘shimcha kuchlar jalb qilingan.
