Yaponiyadagi zilzila qurbonlari soni 13 nafarga yetdi

 

Yaponiyaning Kyushu orolida sodir bo‘lgan 7,1 magnitudali zilzila oqibatida halok bo‘lganlar soni 13 nafarga yetdi. Bu haqda BBC xabar berdi.

 

Yaponiya bosh vaziri Sanae Takaichining ma’lum qilishicha, zilzila oqibatida qulagan binolar, yong‘inlar va infratuzilmaga jiddiy zarar yetgan. Hozirda yordam kutayotgan fuqarolarni qutqarish ishlari barcha tegishli xizmatlar tomonidan davom ettirilmoqda.

 

«13 kishining vafot etgani tasdiqlandi. Bundan tashqari, ko‘plab odamlar jarohat olgan. Ayrim hududlarda odamlar hanuz yordam kutmoqda. Imkon qadar ko‘proq inson hayotini saqlab qolish uchun barcha resurslarimiz safarbar etilgan», — dedi bosh vazir.

 

Rasmiy ma’lumotlarga ko‘ra, 7 kishi og‘ir, 29 kishi yengil tan jarohati olgan. 9 mingdan ortiq fuqaro vaqtinchalik evakuatsiya markazlariga joylashtirilgan.

 

Shuningdek, tabiiy ofat oqibatida 36,9 mingga yaqin xonadon elektr energiyasisiz, 84 mingga yaqin uy va xonadon ichimlik suvisiz, 9,5 ming iste’molchi esa gaz ta’minotisiz qolgan. Ayrim hududlarda aloqa tizimlarida ham uzilishlar kuzatilmoqda.

 

Zilzila oqibatlarini bartaraf etish va qidiruv-qutqaruv ishlariga Yaponiya O‘zini o‘zi himoya qilish kuchlarining 4,6 mingga yaqin harbiy xizmatchisi jalb etilgan.

 

Mutaxassislarning qayd etishicha, 7,1 magnitudali zilzila so‘nggi yillarda Yaponiyada kuzatilgan eng kuchli tabiiy ofatlardan biri bo‘ldi. Hozirda qidiruv-qutqaruv ishlari davom etmoqda.