Damas’da 28 nafar bola tashigan haydovchiga jarima bali yozildi
Bolalarning besh nafari avtomobilning old o‘rindig‘ida joylashtirilgan bo‘lgan
Farg‘ona viloyatining Toshloq tumanida o‘tkazilgan reyd davomida Damas rusumidagi avtomobilda 20 nafardan ortiq bola noqonuniy ravishda tashilayotgani aniqlandi. Bu haqda YHXX xabar berdi.
Ma’lum qilinishicha, Toshloq tumanining Turvat mahalla fuqarolar yig‘ini hududida Yo‘l harakati xavfsizligi xodimlari tomonidan to‘xtatilgan Damas avtomashinasida 28 nafar voyaga yetmagan yo‘lovchi olib ketilayotgan bo'lgan.
Qayd etilishicha, bolalarning besh nafari avtomobilning old o‘rindig‘ida joylashtirilgan bo‘lgan. Bu esa yo‘l harakati xavfsizligi talablariga zid hisoblanadi.
Holat yuzasidan haydovchiga nisbatan Ma’muriy javobgarlik to‘g‘risidagi kodeksning 128¹⁸-moddasi asosida ma’muriy bayonnoma rasmiylashtirildi hamda uning hisobiga 0,3 jarima bali yozildi.
Mas’ullar ota-onalarni farzandlarini belgilangan me’yorlardan ortiq yo‘lovchi tashiyotgan transport vositalariga chiqarmaslikka chaqirib, bunday holatlar bolalar hayoti va xavfsizligi uchun jiddiy xavf tug‘dirishini ta’kidladi.
