Jazoirda yo‘lovchi avtobusi ag‘darildi, 25 kishi halok bo‘ldi
Hodisa oqibatida yana 44 kishi jarohatlandi.
Jazoirning Bumerdes viloyatida yo‘lovchi avtobusi yo‘ldan chiqib ag‘darilishi oqibatida kamida 25 kishi halok bo‘ldi, yana 44 kishi jarohatlandi. Bu haqda Anadolu agentligi xabar berdi.
Hodisa 1-avgust kuni Jazoir shimolidagi Bumerdes viloyatida sodir bo‘ldi. Rasmiy ma’lumotlarga ko‘ra, Setif viloyatidan yo‘lga chiqqan yo‘lovchi avtobusi noma’lum sabablarga ko‘ra yo‘ldan chiqib ketib, ag‘darilgan.
Jazoir Fuqarolik muhofazasi xizmati ma’lum qilishicha, avariya oqibatida kamida 25 kishi halok bo‘lgan, 44 kishi esa turli darajadagi tan jarohatlari olgan.
Hodisa joyida qutqaruv va tezkor yordam ishlari davom etmoqda. Avariya sabablari yuzasidan tekshiruv boshlangan.
