Qozog‘istonda xorijliklar uchun pullik elektron kirish ruxsatnomasi joriy etilishi mumkin
To‘lovlar raqamli infratuzilmani rivojlantirish va shaxsiy ma’lumotlarni himoya qilish xarajatlarini qoplashga yo‘naltiriladi.
Qozog‘iston Ichki ishlar vazirligi xorijliklar uchun mamlakatga pullik elektron kirish ruxsatnomalarini joriy etishni nazarda tutuvchi hukumat qarori loyihasini ishlab chiqdi. Hujjat “Ochiq normativ-huquqiy hujjatlar” portalida jamoatchilik muhokamasiga qo‘yilgan, deya xabar bermoqda Meduza.
Qaror loyihasiga ko‘ra, to‘lovlar raqamli infratuzilmani rivojlantirish va shaxsiy ma’lumotlarni himoya qilish xarajatlarini qoplashga yo‘naltiriladi. Biroq elektron ruxsatnoma narxi hamda yangi tartib qaysi toifadagi xorijliklarga tatbiq etilishi hozircha ochiqlanmagan.
Ma’lum qilinishicha, pullik elektron kirish ruxsatnomalarini 2026-yil avgust–dekabr oylarida bosqichma-bosqich joriy etish rejalashtirilgan.
Loyiha prezident Qosim-Jomart To‘qayevning migratsiya nazoratini modernizatsiya qilish va raqamlashtirish bo‘yicha topshirig‘i ijrosi doirasida ishlab chiqilgan. Joriy yil iyun oyida prezident elektron kirish ruxsatnomasi tizimini joriy etishga huquqiy asos yaratgan qonunni imzolagan edi.
Qaror loyihasi 17-avgustga qadar jamoatchilik muhokamasida bo‘ladi.
