Toshkentda mast yigit keksa ayolga nisbatan uyatsiz harakat sodir etganlikda gumonlanmoqda
Holat yuzasidan unga nisbatan ma’muriy bayonnoma rasmiylashtirilib, ish sudga yuborildi.
Ijtimoiy tarmoqlarda noma’lum shaxsning keksa ayolga nisbatan nojo‘ya harakatlar sodir etgani aks etgan xabar keng muhokamalarga sabab bo‘ldi. Holat yuzasidan Toshkent shahar Ichki ishlar bosh boshqarmasi rasmiy ma’lumot berdi.
Ma’lum qilinishicha, 2026-yil 4-avgust kuni soat 05:30 atrofida Yashnobod tumani Shirinobod mahallasi hududida 2004-yilda tug‘ilgan M.X. mast holatda keksa ayolga nisbatan uyatsiz buzuq harakat sodir etgan. Voqeadan so‘ng u hodisa joyidan ketishga uringan, biroq fuqarolar tomonidan ushlanib, ichki ishlar organlari xodimlariga topshirilgan.
Holat yuzasidan Yashnobod tumani IIO FMB tomonidan M.X.ga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik), 187-moddasi (jamoat joylarida alkogol mahsulotini iste’mol qilish) hamda 194-moddasi (ichki ishlar organi xodimining qonuniy talabini bajarmaslik) alomatlari bilan ma’muriy bayonnoma rasmiylashtirildi.
To‘plangan hujjatlar qonuniy chora ko‘rilishi uchun Jinoyat ishlari bo‘yicha Yashnobod tuman sudiga yuborilgan.
