Tramp Vensni o‘z vorisi sifatida ko‘rmoqda — WP
Tramp shu paytgacha omma oldida Jey Di Vens va davlat kotibi Marko Rubio o‘rtasida aniq tanlov qilmagandi.
AQSH prezidenti Donald Tramp Respublikachilar partiyasi homiylariga vitse-prezident Jey Di Vensni 2028-yilgi prezidentlik saylovida qo‘llab-quvvatlash niyatida ekanini aytdi. Bu haqda The Washington Post'ga tayanib, Anadolu xabar berdi.
Nashr ma’lumotiga ko‘ra, Tramp taxminan ikki hafta avval Oq uyda homiylar bilan uchrashuvda: "Oxir-oqibat, biz Jey Dini saylashimiz kerak", degan.
Qayd etilishicha, Tramp shu paytgacha omma oldida Jey Di Vens va davlat kotibi Marko Rubio o‘rtasida aniq tanlov qilmagan. U har ikki siyosatchini maqtab kelgan va o‘zining afzal vorisi kimligini ochiqlamagan.
Shunga qaramay, manbalardan biri Tramp xususiy suhbatlarda Vensni o‘zidan keyin Respublikachilar partiyasiga yetakchilik qiladigan siyosatchi sifatida ko‘rayotganini aytgan. Biroq boshqa maslahatchilar prezident hali yakuniy qarorga kelmaganini va fikrini o‘zgartirishi mumkinligini bildirgan.
Hozircha Jey Di Vens 2028-yilgi prezidentlik saylovida ishtirok etishini rasman e’lon qilmagan. The Washington Post’ga ko‘ra, u bu masalada keyinroq qaror qabul qilishi kutilmoqda.
