Kolumbiyada 7,4 magnitudali zilzila oqibatida kamida 82 kishi halok bo‘ldi
Zilzila Choko provinsiyasida 107 kilometr chuqurlikda qayd etilgan va mamlakatning bir qator yirik shaharlarida ham sezilgan.
Kolumbiyaning g‘arbiy qismida 7,4 magnitudali kuchli zilzila sodir bo‘lib, kamida 82 kishi halok bo‘ldi. Tabiiy ofat oqibatida bir necha shaharda binolar qulagan, ayrim odamlar vayronalar ostida qolgan. Bu haqda Reuters xabar berdi.
AQSh Geologiya xizmati ma’lumotlariga ko‘ra, zilzila dushanba kuni erta tongda Tinch okeani sohilidagi Choko provinsiyasida, San-Xose-del-Palmar shahri yaqinida 107 kilometr chuqurlikda qayd etilgan. Zilzila mamlakatning yirik shaharlarida ham sezilgan.
Eng ko‘p qurbonlar g‘arbdagi Risaralda provinsiyasida qayd etilgan. Viloyat gubernatori Xuan Diego Patinoning ma’lum qilishicha, hududda 42 kishi halok bo‘lgan.
Kolumbiyaning yirik shaharlaridan biri Kali ham zilziladan jiddiy zarar ko‘rgan. Shahar meri Alexandro Ederning aytishicha, kamida 30 ta bino qulagan, qutqaruvchilar esa ularning 10 tasida ish olib bormoqda. Hozircha shahardagi qurbonlar soni rasman tasdiqlanmagan.
Provinsiya poytaxti Pereyrada ham binolar qulagan. Manizales shahridagi neogotik sobor minoralaridan birining yuqori qismi ham zilzila oqibatida qulab tushgan.
Zilzila markaziga eng yaqin Choko provinsiyasi gubernatori Nubia Karolina Kordoba-Kuri Kivdo shahrida qurbonlar, o‘nlab jabrlanganlar va katta vayronagarchiliklar qayd etilganini bildirgan. Aholi takroriy zilzilalar ehtimolidan ogohlantirilgan.
Qutqaruv ishlari davom etmoqda. Qurbonlar va vayronagarchiliklar soni ortishi mumkin.
