Tataristondagi dron hujumida 7 nafar O‘zbekiston fuqarosi halok bo‘ldi
Hujum oqibatida halok bo‘lganlar orasida Tojikiston fuqarolari ham borligi xabar qilingan.
Rossiyaning Tatariston Respublikasi Nijnekamsk shahrida 10-avgust kuni qator obyektlarga uchuvchisiz uchish apparatlari orqali hujum uyushtirilishi oqibatida 7 nafar O‘zbekiston fuqarosi halok bo‘ldi.
O‘zbekistonning Qozon shahridagi Bosh konsulxonasi ma’lumotiga ko‘ra, Tatariston Respublikasining huquqni muhofaza qiluvchi idoralari hodisa oqibatida jami 13 kishi halok bo‘lgani, 39 kishi turli darajada jarohat olganini ma’lum qilgan.
Bosh konsulxona mazkur holatni nazoratga olgan. Hodisa tafsilotlariga aniqlik kiritish hamda halok bo‘lgan fuqarolarning huquq va manfaatlarini ta’minlash maqsadida mahalliy mas’ul idoralar va tergov organlari bilan zarur aloqalar o‘rnatilgan.
Vafot etgan O‘zbekiston fuqarolarining jasadlari sud-tibbiy ekspertiza va zarur rasmiy jarayonlar yakunlanganidan so‘ng Vatanga qaytariladi.
Rossiya rasmiylari hujum Nijnekamskdagi ishlab chiqarish va fuqarolik obyektlariga qaratilganini ma’lum qilgan. Hodisa yuzasidan Rossiyada jinoyat ishi qo‘zg‘atilgan.
Hujum oqibatida halok bo‘lganlar orasida Tojikiston fuqarolari ham borligi xabar qilingan.
Tatariston rahbari Rustam Minnixanov hujum qurbonlari xotirasiga motam e’lon qilgan.
