Liviyaning eng yirik neftni qayta ishlash zavodiga dronlar hujum qildi

Liviyaning Zaviya shahridagi neft majmuasiga portlovchi moddalar ortilgan dronlar hujum qildi. Hujum oqibatida yoqilg‘i saqlash inshootida yong‘in yuzaga kelgan. Mamlakat Milliy neft korporatsiyasi (NOC) yong‘in tezda nazoratga olinganini ma’lum qildi. Bu haqda DW xabar berdi.

 

Tripolidan g‘arbda joylashgan Zaviya neft majmuasida mamlakatning eng yirik neftni qayta ishlash zavodi faoliyat yuritadi.

 

Ma’lumotlarga ko‘ra, dushanba kuni noma’lum kuchlar tomonidan uyushtirilgan hujumda neftni qayta ishlash korxonasiga portlovchi moddalar ortilgan dronlar zarba bergan. Yong‘in oqibatida taxminan 4,5 million litr benzin saqlangan rezervuar qulab tushgan.

 

Zavod egasi Brega Petroleum Marketing kompaniyasi yong‘in kutilganidan tezroq o‘chirilganini bildirgan. Muhandislar Reuters agentligiga zararning cheklanganini, biroq korxona faoliyati vaqtincha to‘xtatilganini ma’lum qilgan.

 

Liviyaning xalqaro tan olingan bosh vaziri Abdulhamid Dbayba fuqarolik infratuzilmasiga hujum “javobsiz qolmasligi”ni aytgan. Uning so‘zlariga ko‘ra, muhim obyektlarga dronlar orqali zarba berish “uyushgan va xavfli harakat” bo‘lib, bunga qat’iy javob qaytarish zarur.

 

Shuningdek, seshanba kuni erta tongda yana ikki dron Zaviya elektr stansiyasini nishonga olgan. Ulardan biri yong‘inga qarshi tizimga urilgan, biroq jiddiy zarar yetkazilmagan.

 

Qayd etilishicha, hujumlar Liviyadagi davomli xavfsizlik muammolari fonida yuz berdi. Mamlakat 2011-yilda Muammar Qaddafiy hokimiyatdan ag‘darilganidan buyon siyosiy jihatdan bo‘linib kelmoqda. Tripolidagi hukumat mamlakat g‘arbini, Xalifa Haftar boshchiligidagi Liviya Milliy armiyasi esa sharqiy hududlar va janubning ayrim qismlarini nazorat qiladi.

 

Hodisa ortidan Beng‘ozida ham zo‘ravonlik yuz bergan. Liviya Milliy armiyasi harbiy razvedka boshlig‘i Favzi al-Mansuri avtomobil portlashi oqibatida halok bo‘lganini ma’lum qilgan. Portlash uchun javobgarlar hozircha aniqlanmagan.

 

Liviya Afrikadagi eng yirik tasdiqlangan neft zaxiralariga ega davlat hisoblanadi. Iyun oyida mamlakatda neft qazib olish hajmi sutkasiga 1,44 million barrelga yetgan. Bu 2013-yildan beri qayd etilgan eng yuqori ko‘rsatkich bo‘lsa-da, hukumatning kuniga 2 million barrel qazib olish maqsadidan past.