Shveysariyaning Alp tog‘larida badavlat shaxslar uchun yer osti omborlari qurilmoqda
Qimmat buyumlar saqlangan eski harbiy bunkerlardan ayrimlarini “Rossiya tahdidi” fonida o‘q-dorilar uchun qayta ishga tushirish imkoniyati ko‘rib chiqilmoqda.
Shveysariyaning Alp tog‘larida o‘ta boy insonlarning qimmatbaho buyumlarini saqlashga mo‘ljallangan yer osti g‘orlari tashkil etilmoqda. Loyiha kelasi yildan ishga tushirilishi rejalashtirilgan. Bu haqda Point.md xabar berdi.
Loyiha ishlab chiquvchisi Tomas Gasserning ma’lum qilishicha, Shveysariyaning markaziy qismidagi Bryunig massivida qariyb 20 ta yer osti ombori jihozlanadi. Ularda san’at asarlari, qimmatbaho metallar, kolleksion avtomobillar va qimmatbaho vinolarni saqlash mumkin bo‘ladi.
Inshootlarga kirish nazorat-o‘tkazish punktidan boshlanadi. Shundan so‘ng tashrif buyuruvchilar bir nechta qo‘shimcha tekshiruvlardan o‘tadi. Xavfsizlik tizimining tafsilotlari oshkor qilinmagan.
Har bir g‘ordan foydalanish huquqi 99 yilga ijaraga beriladi. Narxlar 1 million Shveysariya frankidan, ya’ni taxminan 1,07 million yevrodan boshlanadi. Loyiha mualliflari bunday xizmatga talab yuqori ekanini ta’kidlamoqda. Ayrim mijozlar allaqachon inshootlardan foydalanish huquqini sotib olgan.
Tomas Gasserning aytishicha, ayrim boylar o‘z aktivlarining bir qismini xavfsiz joyda saqlashga intilmoqda. U bu holatni ilgari xavfsiz hudud sifatida ko‘rilgan Dubayning jozibadorligi borasidagi qarashlar o‘zgarayotgani bilan izohlagan.
Qayd etilishicha, Shveysariyada ilgari qimmatbaho buyumlarni saqlash uchun eski harbiy bunkerlardan foydalanilgan. Hozir mamlakat armiyasi “Rossiya tahdidi” sharoitida ayrim bunkerlardan yana foydalanish, xususan, o‘q-dorilar va zarur buyumlarni saqlash imkoniyatini ham ko‘rib chiqmoqda.
