Rossiyalik bloger qozoqlarning rus tilini bilmasligini tanqid qilgani uchun Qozog‘istondan chiqarib yuborildi
Kseniya Guzayevaga Qozog‘istonga 5 yil muddatga kirish taqiqlandi.
Qozog‘istonning Ostona shahrida rossiyalik strimer ijtimoiy tarmoqlardagi provokatsion va noo‘rin bayonotlari sabab mamlakatdan chiqarib yuborildi. Bu haqda Ostona shahar politsiya departamentiga tayanib, TASS xabar berdi.
Politsiya xabariga ko‘ra, G. K. ismli xorijiy fuqaro Qozog‘iston hududini tark etgan. Avvalroq sud uni ijtimoiy tarmoqlardagi provokatsion va noo‘rin bayonotlari uchun ma’muriy javobgarlikka tortgan. Unga Qozog‘istonga besh yil muddatga kirish taqiqlandi.
Mahalliy OAV ma’lumotlariga ko‘ra, gap Fasoollka taxallusi bilan tanilgan rossiyalik strimer Kseniya Guzayeva haqida ketmoqda. U ijtimoiy tarmoqlardagi jonli efirlarida, jumladan, Twitch platformasida Pavlodar shahrining Qozog‘istonga tegishliligini shubha ostiga qo‘ygan hamda mahalliy aholini haqorat qilgan.
Qozog‘iston politsiyasi qonunlarga rioya qilish va mamlakatga hurmat bilan munosabatda bo‘lish barcha uchun majburiy ekanini ta’kidladi. Idora strimerning politsiyachilar hamrohligida samolyotga chiqayotgani aks etgan videoni ham e’lon qilgan.
Qozog‘iston qonunchiligiga ko‘ra, internet jamoat joyiga tenglashtirilgan. Politsiya internet tarmog‘ida doimiy monitoring olib boradi.
