Emomali Rahmon Tursunzodada o‘zbek maktabi qurishni buyurdi

Tojikiston Prezidenti Emomali Rahmon Tursunzoda shahridagi o‘zbek tilida so‘zlashuvchi aholi uchun o‘zbek tilida ta’lim beriladigan ta’lim muassasalarini qurish va ularni o‘zbek tilidagi darslik hamda o‘quv materiallari bilan ta’minlashni topshirdi. Bu haqda Tojikiston prezidentining Tursunzodaga ishchi tashrifi davomida ma’lum qilindi, deya yozmoqda “Xovar”.

 

Emomali Rahmon Tursunzoda shahridagi 21-sonli umumta’lim muassasasining ochilish marosimida qatnashib, qurilish ishlarining sifatini yuqori baholadi. U mas’ullar va pedagoglarni ta’lim va tarbiya sifati hamda darajasini oshirishga yanada mas’uliyat bilan yondashishga chaqirdi.

 

Prezident pedagoglar bilan suhbatda zamonaviy fanlarni rivojlantirish, yangi texnika va texnologiyalardan samarali foydalanish, shuningdek, tabiiy, aniq va matematika fanlari hamda xorijiy tillarni o‘rganishga alohida e’tibor qaratish zarurligini ta’kidladi.

 

Tashrif doirasida Tursunzoda shahrida jami 60 ta obyekt qurilib, foydalanishga topshirilgan. Ular orasida ikki smenada 18 ming 200 nafar o‘quvchiga mo‘ljallangan 20 ta umumta’lim muassasasi, 950 nafar bolaga mo‘ljallangan 5 ta xususiy maktabgacha ta’lim muassasasi, 4 ta sanoat korxonasi, 1 ta turizm obyekti, 5 ta xizmat ko‘rsatish obyekti, 6 ta sport maydonchasi, umumiy sig‘imi 5 ming 300 tonna bo‘lgan 3 ta zamonaviy sovutish majmuasi, 9 ta ko‘p qavatli turar joy binosi, ma’muriy va madaniy inshootlar, Davlat bayrog‘i maydoni hamda Madaniyat va istirohat bog‘i bor. Mazkur loyihalar natijasida 1 ming 220 ta doimiy ish o‘rni yaratilgan.

 

Mas’ul shaxslarning ma’lumotiga ko‘ra, hozirda Tursunzoda shahrida 132 ta umumta’lim muassasasi faoliyat yuritadi. Ularda 78 ming 863 nafardan ortiq o‘quvchi ta’lim va tarbiya olmoqda.

 

Tojikiston Davlat mustaqilligining 35 yilligini munosib nishonlashga tayyorgarlik doirasida Tursunzodada yana 24 ta ta’lim muassasasini qurish va foydalanishga topshirish rejalashtirilgan. Hozirgacha ulardan 19 ta o‘quv binosi foydalanishga topshirilgan bo‘lib, ularning umumiy sig‘imi 8 ming 185 o‘rinni tashkil etadi.