Turkiyada 10 nafarga yaqin O‘zbekiston fuqarosi shubhali pul o‘tkazmalari bo‘yicha tergov qilinmoqda
Ularning ayrimlari sud qaroriga asosan jazoni ijro etish muassasasida, ayrimlari esa deportatsiya markazida saqlanmoqda.
Turkiyaning Aydin viloyatida O‘zbekiston fuqarolari bank kartalari orqali amalga oshirilgan shubhali pul o‘tkazmalari bilan bog‘liq holat yuzasidan tergov qilinmoqda. Bu haqda O‘zbekistonning Istanbuldagi Bosh konsulxonasi ma’lum qildi.
Turkiya Ichki ishlar vazirligining tegishli tuzilmalaridan olingan dastlabki ma’lumotlarga ko‘ra, hozirda 10 nafarga yaqin O‘zbekiston fuqarosiga nisbatan tergov-surishtiruv ishlari olib borilmoqda.
Qayd etilishicha, ularning ayrimlari sud qaroriga asosan jazoni ijro etish muassasasida, ayrimlari esa deportatsiya markazida saqlanmoqda. Yana bir qismi mamlakat hududidan chiqmaslik sharti bilan ozod qilingan va ularga nisbatan tergov harakatlari davom ettirilmoqda.
Fuqarolarga nisbatan qo‘llanayotgan huquqiy choralar ularning holatga aloqadorlik darajasi, bank hisobvaraqlari orqali o‘tkazilgan mablag‘lar miqdori hamda tergov davomida aniqlanayotgan boshqa holatlardan kelib chiqib belgilanmoqda.
O‘zbekistonning Istanbuldagi Bosh konsulxonasi vaziyatni Turkiyaning tegishli idoralari bilan hamkorlikda kuzatib bormoqda. Fuqarolarning qonuniy huquq va manfaatlarini himoya qilish doirasida zarur konsullik-huquqiy yordam ko‘rsatilmoqda.
Bosh konsulxona fuqarolarni bank kartalari, hisob raqamlari va mobil bank xizmatlarini begona shaxslarga bermaslikka, shuningdek, kelib chiqishi noma’lum mablag‘larni qabul qilmaslik va o‘tkazmaslikka chaqirdi.
Qayd etilishicha, bank kartasi yoki hisob raqamini boshqa shaxslar foydalanishi uchun berish, shuningdek, kelib chiqishi noma’lum mablag‘larni o‘tkazishda vositachilik qilish Turkiya qonunchiligiga ko‘ra jiddiy huquqiy javobgarlikka sabab bo‘lishi mumkin.
