AQShda favqulodda holat e’lon qilindi
Mamlakat elektr tarmog‘ida xorijiy uskunalardan foydalanishga cheklovlar joriy etiladi.
AQSh prezidenti Donald Tramp mamlakat elektr energetika tizimiga xorijdan yetkazib berilayotgan uskunalar bilan bog‘liq xavflar sabab milliy favqulodda holat e’lon qilish to‘g‘risidagi farmonni imzoladi.
Farmonga ko‘ra, agar xorijda ishlab chiqarilgan elektr jihozlari yoki texnologiyalar milliy xavfsizlikka tahdid tug‘dirishi aniqlansa, AQSh rasmiylari ularni sotib olish, import qilish, o‘tkazish va o‘rnatishni cheklashi yoki taqiqlashi mumkin.
Trampning ta’kidlashicha, ma’lumotlar markazlari, sun’iy intellekt texnologiyalari va mudofaa sanoatining jadal rivojlanishi AQShning barqaror elektr ta’minotiga qaramligini yanada oshirgan. Shu sababli elektr tarmog‘iga qarshi ehtimoliy hujumlarning oqibatlari yanada jiddiy bo‘lishi mumkin.
Hujjatda ayrim yuqori kuchlanishli transformatorlar, aqlli elektron qurilmalar, generatorlar, quyosh va batareya tizimlari uchun invertorlar, shuningdek, elektr tarmog‘idagi zaifliklardan kiberhujumlarda foydalanish imkonini beradigan ayrim xorijiy dasturiy ta’minot va raqamli komponentlar xavf tug‘dirishi mumkinligi qayd etilgan.
Tramp farmonda xorijdan elektr jihozlari yetkazib berilishi bilan bog‘liq vaziyatni AQShning milliy xavfsizligi, tashqi siyosati va iqtisodiyotiga g‘ayrioddiy va favqulodda tahdid sifatida baholagan.
