Qiymati 400 BHMdan oshadigan tovarlar uchun naqd pulda to‘lov qilib bo‘lmaydi

O‘zbekistonda qiymati bazaviy hisoblash miqdorining (BHM) 400 baravaridan oshadigan tovar va xizmatlar uchun to‘lovlarni naqd pulda amalga oshirish taqiqlandi. Endilikda bunday to‘lovlar bank kartalari yoki elektron to‘lov tizimlari orqali amalga oshiriladi. Bu Prezidentning 27-avgustdagi farmonida belgilangan.

 

Avval mazkur cheklov qiymati 25 mln so‘mdan oshadigan tovar va xizmatlarga nisbatan qo‘llangan. Yangi tartibga ko‘ra, chegara BHMning 400 baravari etib belgilandi.

 

2026-yil 1-sentyabrdan BHM 412 ming so‘mdan 440 ming so‘mga oshirilishi munosabati bilan 400 BHM 176 mln so‘mni tashkil etadi.

 

Naqd pulsiz to‘lov majburiy bo‘lgan holatlar qatoriga davlat organlari ko‘rsatadigan xizmatlar, elektr energiyasi, tabiiy gaz va ichimlik suvi uchun to‘lovlar, alkogol va tamaki mahsulotlari, yoqilg‘i quyish shoxobchalarida neft-gaz mahsulotlarini sotish hamda elektromobillarni zaryadlash xizmatlari kiradi.

 

Shuningdek, qiymati 400 BHMdan oshadigan tovar va xizmatlar, ko‘chmas mulk obyektlari, ishlab chiqarilganiga 10-yildan oshmagan M, N, O va G toifadagi transport vositalari hamda maxsus avtotransport vositalarining oldi-sotdisida ham to‘lovlar bank kartasi yoki elektron to‘lov tizimlari orqali amalga oshiriladi. Qishloq xo‘jaligi mahsulotlari bundan mustasno.

 

Farmonda tadbirkorlik faoliyatini himoya qilishga qaratilgan boshqa choralar ham belgilangan. Jumladan, davlat organlari va tadbirkorlik subyektlari o‘rtasidagi ommaviy-huquqiy munosabatlarda tadbirkorning haqlilik prezumpsiyasi amal qiladi.

 

Qonunchilikdagi bartaraf etib bo‘lmaydigan ziddiyat va noaniqliklar, shuningdek, davlat organi taqdim etgan dalillarning yetarli emasligi sababli yuzaga keladigan shubhalar tadbirkor foydasiga talqin etiladi.

 

Bundan tashqari, tadbirkorlar uchun “Ikkinchi imkon” iqtisodiy amnistiyasi joriy etiladi. Moliyaviy jarima qo‘llashda birinchi xato uchun ogohlantirish berish qoidasi kiritiladi. Kichik tadbirkorlik subyektlarini tekshirishga esa uch yil muddatga moratoriy joriy etiladi.