Qozog‘iston Prezidenti Yerlan Karinni vitse-prezident etib tayinladi

Qozog‘iston Prezidenti Qosim-Jo‘mart To‘qayev Yerlan Karinni mamlakat vitse-prezidenti etib tayinladi.

 

31-avgust kuni Ostonada yangi saylangan Qurultoyning birinchi yalpi majlisida Prezident To‘qayev Yerlan Karin nomzodini vitse-prezidentlikka taqdim etdi. Ovoz berishda ishtirok etgan 145 nafar deputatning 141 nafari uning nomzodini qo‘llab-quvvatladi, 4 nafari betaraf qoldi. Shundan so‘ng davlat rahbari tegishli farmonni imzoladi.

 

50 yoshli Yerlan Karin 2019-yildan buyon Qosim-Jo‘mart To‘qayev jamoasida turli yuqori lavozimlarda, jumladan, Prezident yordamchisi, Davlat kotibi va Davlat maslahatchisi sifatida faoliyat yuritgan. 2026-yil 30-iyunda u Qozog‘iston Prezidenti Administratsiyasi rahbarining birinchi o‘rinbosari etib tayinlangan edi.

 

Qozog‘istonda 15-mart kuni o‘tkazilgan umumxalq referendumida Konstitutsiyaning yangi tahriri qabul qilindi va u 1-iyuldan kuchga kirdi. Unga ko‘ra, ikki palatali Parlament o‘rniga bir palatali parlament — Qurultoy tashkil etildi. Shuningdek, vitse-prezident lavozimi qayta joriy qilindi.

 

Konstitutsiyaga muvofiq, vitse-prezident Qurultoyning ko‘pchilik ovozi bilan bergan roziligi asosida Prezident tomonidan tayinlanadi. Vitse-prezident Qurultoy, Hukumat va boshqa davlat organlari bilan munosabatlarda Prezident nomidan ish yuritishi mumkin. Prezidentning vakolatlari muddatidan oldin tugatilgan yoki u vafot etgan taqdirda, davlat rahbari vakolatlari vitse-prezidentga o‘tadi.

 

Ma’lumot uchun, Qozog‘istonda vitse-prezident lavozimi avval ham mavjud bo‘lgan. Mustaqil Qozog‘istonda Yerik Asanbayev 1991-yilda vitse-prezident etib saylangan. Lavozim 1995-yilda qabul qilingan Konstitutsiyadan keyin bekor qilinib, Asanbayev 1996-yil fevral oyiga qadar vakolatlarini amalga oshirgan.