Buxoroda talaba qizga shahvoniy shilqimlik qilgan tyutor qamaldi
Talaba qiz sudda ular o‘rtasida avval hech qanday kelishmovchilik bo‘lmaganini aytib, tyutorga nisbatan da’vosi yo‘qligini bildirgan.
Buxoroda tunda talaba qizga qo‘ng‘iroq qilib, uni oraliq nazoratlardan o‘tkazib qo‘yishini aytgan va shahvoniy shilqimlik qilgan universitet tyutoriga 3 sutka ma’muriy qamoq jazosi tayinlandi.
Sud hujjatlariga ko‘ra, hodisa 2026-yil 14-avgust kuni soat taxminan 22:00 da Buxoro shahridagi universitetlardan birida yuz bergan. Universitetda tyutor bo‘lib ishlovchi A.A. o‘zi rahbarlik qiladigan guruh talabasiga qo‘ng‘iroq qilgan.
Suhbat davomida tyutor talabani oraliq nazoratlardan o‘tkazib qo‘yishini aytib, unga shahvoniy shilqimlik qilgan. Qiz uning gaplaridan qo‘rqib, huquqni muhofaza qiluvchi organlarga murojaat qilishini bildirgan. Shunga qaramay, A.A. qo‘ng‘iroq qilishda davom etib, talabaning sha’ni va qadr-qimmatini kamsituvchi nomaqbul so‘zlarni aytgan.
Sudda A.A. qilmishini tan olgan. U o‘sha kuni mast bo‘lgani sababli talabaga bunday taklif bilan chiqqanini aytgan. Shuningdek, qizdan kechirim so‘raganini va bunday holat boshqa takrorlanmasligini bildirgan.
Talaba qiz esa ular o‘rtasida avval hech qanday kelishmovchilik bo‘lmaganini aytib, tyutorga nisbatan da’vosi yo‘qligini bildirgan.
Jinoyat ishlari bo‘yicha Buxoro shahar sudi A.A.ni Ma’muriy javobgarlik to‘g‘risidagi kodeksning 41-1-moddasi 1-qismida nazarda tutilgan shahvoniy shilqimlik qilish huquqbuzarligini sodir etgan deb topgan.
Unga 3 sutka ma’muriy qamoq jazosi tayinlangan.
