Chiroqchida maktab direktori qo‘shimcha dars soatlari evaziga pora olgani uchun 2 yilga qamaldi
O‘qituvchi direktorga 50 dollar bergach, holat haqida huquqni muhofaza qiluvchi organlarga xabar bergan. Tezkor tadbirda direktor qo‘lga olingan.
Qashqadaryo viloyati Chiroqchi tumanida o‘qituvchiga qo‘shimcha dars soatlari ajratish evaziga pul talab qilgan maktab direktori 2 yilga ozodlikdan mahrum qilindi.
Sud hujjatlariga ko‘ra, fuqaro 2022-yil iyunidan buyon tumandagi maktablardan birida direktor lavozimida ishlab kelgan.
2026-yil may oyida maktab o‘qituvchisi 2026/2027-o‘quv yilida dars soatlarini ko‘paytirishni so‘rab direktorga murojaat qilgan. Direktor dastlab bunga rozi bo‘lmagan, biroq 1000 dollar berilsa, qo‘shimcha dars soatlari ajratilishida yordam berishini bildirgan. O‘qituvchi oilaviy sharoitini tushuntirgach, direktor 700 dollarga kelishgan.
Shundan so‘ng o‘qituvchi direktorning uyiga borib, unga avans sifatida 50 dollar bergan va holat yuzasidan Bosh prokuratura departamentining Chiroqchi tumani bo‘limiga murojaat qilgan. Murojaat asosida tezkor tadbir o‘tkazilib, maktab rahbari ushlangan.
Sudda direktor pulni dars soatlarini ko‘paytirish evaziga emas, balki qarz sifatida olganini bildirgan va yengillik so‘ragan.
Sud hukmiga ko‘ra, fuqaro Jinoyat kodeksining 210-moddasi 1-qismi — pora olishda aybdor deb topilgan. Unga 2 yil muddatga ozodlikdan mahrum qilish jazosi tayinlangan.
Shuningdek, u 2 yil davomida ta’lim muassasalarida rahbarlik hamda moddiy javobgarlik bilan bog‘liq lavozimlarda ishlash huquqidan mahrum qilingan.
