O‘zbekiston Jurnalistlar uyushmasi 35 ta “Mahorat maktabi”ni tashkil etdi
Mashg‘ulotlar internet jurnalistikasi, bosma matbuot, televideniye, radio, huquqiy, sport va fotojurnalistika yo‘nalishlarida o‘tkaziladi.
O‘zbekiston Jurnalistlar uyushmasi mamlakat mustaqilligining 35 yilligi munosabati bilan respublika hududlarida 35 ta taniqli jurnalistning “Mahorat maktabi”ni tashkil etdi.
Tashabbus Uyushma Ustavida belgilangan ustuvor vazifalarni amalga oshirish maqsadida yo‘lga qo‘yilgan. Unda o‘ziga xos ijod maktabini yaratgan jurnalistlar tajribasini ommalashtirish, “Ustoz-shogird” an’analarini qo‘llab-quvvatlash hamda yosh jurnalistlar bilan muntazam ishlash ko‘zda tutilgan.
35 ta “Mahorat maktabi”ning 20 tasi Uyushmaning hududiy bo‘limlari tomonidan muvofiqlashtiriladi. 15 tasi esa Toshkent shahrida Uyushmaning markaziy apparati qoshida faoliyat yuritadi.
Toshkent shahridagi mashg‘ulotlar O‘zbekiston Milliy matbuot markazida, Kontent markazida va tahririyatlarda o‘tkaziladi. Buning uchun zarur shart-sharoitlar yaratiladi. “Mahorat maktabi”ni boshqargan ijodkorlarni rag‘batlantirish choralari ham ko‘riladi.
Saboqlar internet jurnalistikasi, bosma matbuot, televideniye, radio, huquqiy jurnalistika, sport jurnalistikasi va fotоjurnalistika kabi yo‘nalishlarda olib boriladi.
“Mahorat maktablari”ga jurnalistika yo‘nalishida tahsil olayotgan talabalar hamda sohaga qiziquvchi yoshlar jalb etiladi. Mashg‘ulotlar yakunida ishtirokchilarga sertifikat beriladi.
Uyushma ma’lumotiga ko‘ra, mazkur tashabbus jurnalistlarning yangi avlodini tayyorlash borasida boshlangan tizimli faoliyatning uzviy qismi hisoblanadi. Kelgusida ushbu yo‘nalishdagi amaliy ishlar turli tanlovlar va loyihalar orqali izchil davom ettiriladi.
