Shahnoza Mirziyoyeva Musulmon Yunusovning murojaati yuzasidan munosabat bildirdi
U bolalar va ularning oilalari uchun erta aralashuv, reabilitatsiya, abilitatsiya, kunduzgi parvarish va uyda yordam ko‘rsatish xizmatlari bepul ekanini taʼkidladi.
Ijtimoiy tarmoqlarda aktyor Musulmon Yunusovning farzandiga nogironlikni rasmiylashtirish jarayonida duch kelgan qiyinchiliklari muhokama qilinmoqda.
Mazkur holat Shahnoza Mirziyoyeva tomonidan atroflicha o‘rganilib, oilaga amaliy yordam ko‘rsatilgani maʼlum qilindi.
Shahnoza Mirziyoyeva nogironlikni belgilash tartibi barcha fuqarolar uchun yagona va shaffof ekanini taʼkidladi.
Shuningdek, joriy yilda yo‘lga qo‘yilgan erta aralashuv, reabilitatsiya va abilitatsiya, kunduzgi parvarish hamda uyda yordam ko‘rsatish xizmatlari bolalar va ularning oilalari uchun mutlaqo bepul ekani qayd etildi.
Agar nogironlikni belgilash jarayonining biror bosqichida oiladan pul talab qilinsa yoki jarayon asossiz ravishda cho‘zilsa, bu qonunchilikning bevosita buzilishi hisoblanishi va bunday holatni hech qanday sabab bilan oqlab bo‘lmasligi taʼkidlandi.
Shahnoza Mirziyoyeva fuqarolarning bildirilayotgan fikr-mulohazalari va murojaatlari uchun minnatdorlik bildirdi. Uning qayd etishicha, yirik tizimda mavjud barcha kamchiliklarni darhol aniqlash har doim ham imkoni bo‘lmaydi. Shu bois fuqarolarning murojaatlari tizimdagi zaif nuqtalarni aniqlash va ularni bartaraf etishda muhim ahamiyat kasb etadi.
Shahnoza Mirziyoyeva uchun joriy etilayotgan xizmatlarning insonlarga amaliy naf keltirishi, har bir fuqaro uchun teng, manzilli va qulay bo‘lishi muhim ekani qayd etildi.
