Xorazmlik fuqaro 824 mln jarimaga tortilgani aytilmoqda
MIB holat yuzasidan Zamon.uz‘ga rasmiy munosabat bildirdi.
Ijtimoiy tarmoqlarda Xorazmlik tadbirkorga 824 mln so‘m miqdorida soliq jarimasi solingani haqida video tarqaldi. Mazkur holat yuzasidan Majburiy ijro byurosi izoh berdi.
Ma’lum qilinishicha, fuqaro B. Otayevning ijtimoiy tarmoqlardagi videomurojaati o‘rganilgan.
Fuqarolik ishlari bo‘yicha Urganch tumanlararo sudining hal qiluv qaroriga ko‘ra, “MAMATSAPO XAJARBIBI” oilaviy korxonasining qoplanmagan soliq qarzini korxona rahbari B. M. Otayevdan subsidiar tartibda, ya’ni korxona tomonidan qoplanmagan majburiyatlarni uning shaxsiy mol-mulki hisobidan undirish belgilangan.
Sud hujjatiga asosan Xorazm viloyati soliq boshqarmasi foydasiga 792 948 384 so‘m soliq qarzi, 41 200 so‘m pochta xarajati hamda davlat foydasiga 31 717 935 so‘m davlat boji undirilishi belgilangan.
MIB ma’lumotiga ko‘ra, ushbu mablag‘lar soliq organi tomonidan tadbirkorga alohida jarima sifatida qo‘llanilgan summa emas. Qarzdorlik “MAMATSAPO XAJARBIBI” oilaviy korxonasi tomonidan o‘z vaqtida bajarilmagan soliq majburiyatlari natijasida yuzaga kelgan.
Mazkur qarzdorlikni tadbirkordan subsidiar tartibda undirish esa qonuniy kuchga kirgan sud qarori bilan belgilangan.
Ijro hujjatlari 2026-yil 29-avgust kuni MIBning tegishli bo‘limi ish yurituviga kelib tushgan.
Qarzdorni ijro hujjatida belgilangan majburiyatlardan xabardor qilish va ularni ixtiyoriy ravishda bajarish imkoniyatini ta’minlash maqsadida qonunchilikda belgilangan tartibda uning telefon raqamiga SMS-xabarnomalar yuborilgan.
Ayni vaqtda mazkur ijro hujjati bo‘yicha qonunchilikda belgilangan tartibda ijro harakatlari davom ettirilmoqda.
