Kredit qarzini undirishda bank kartasida kamida 680 ming so‘m qoldirish taklif etilmoqda
Loyiha jamoatchilik muhokamasiga qo‘yildi.
Markaziy bank kredit qarzdorligini undirishda mijozning barcha bank kartalaridan mablag‘larni to‘liq yechib olishni cheklashni taklif qilmoqda. Unga ko‘ra, qarzdorning bank kartalari hisoblarida kamida 680 ming so‘m qoldirilishi kerak bo‘ladi.
Tegishli o‘zgartirishlar bank xizmatlari iste’molchilari bilan munosabatlarda tijorat banklari faoliyatiga qo‘yiladigan minimal talablar to‘g‘risidagi nizomga kiritilishi rejalashtirilmoqda. Loyiha jamoatchilik muhokamasiga qo‘yilgan.
Hujjatga ko‘ra, kredit yoki kafillik bo‘yicha to‘lovlar mijozning topshirig‘isiz undirilganda, bank uning barcha bank kartalari hisoblarida eng kam ish haqining yarmiga teng mablag‘ni saqlab qolishi kerak bo‘ladi.
Hozirda eng kam ish haqi 1 mln 360 ming so‘m etib belgilangan. Uning yarmi 680 ming so‘mni tashkil qiladi.
Bunda shartnomada majburiy rekvizitlari ko‘rsatilgan va/yoki qarzdorlik bo‘yicha to‘lovlarni undirish uchun bankning mobil ilovasiga ulangan bank kartalari bundan mustasno bo‘ladi.
Avvalroq UZCARD avtomatik akseptsiz yechib olish xizmati shartlarini o‘zgartirgani haqida xabar berilgan edi. 15-apreldan boshlab qarzdorlikni undirishda banklar mijoz kartasida kamida 3 BHM miqdoridagi kamaytirilmaydigan qoldiqni saqlashi kerak. Biroq mazkur qoida UZCARD to‘lov tizimi doirasida amal qiladi.
Markaziy bank yangi taklif orqali ushbu cheklovni tijorat banklari faoliyatiga qo‘yiladigan talablar darajasida belgilashni rejalashtirmoqda.
Loyiha muhokamasi 14-sentyabrgacha davom etadi.
