Toshkentdagi maktabda 3-sinf o‘quvchisi temir yutishga majburlandi
Bola yot jismni yutib yuborgach, shifoxonaga yotqizilib, operatsiya qilingan.
Ijtimoiy tarmoqlarda Toshkent shahrida maktab o‘quvchisi og‘ir holatda shifoxonaga yotqizilgani haqida xabarlar tarqaldi. Mazkur holat Bolalar ombudsmani tomonidan nazoratga olinib, o‘rganilmoqda.
Aniqlanishicha, 2-sentabr kuni Toshkent shahrining Yashnobod tumanidagi maktabda 3-sinf o‘quvchisi yuqori sinf o‘quvchilari tomonidan tahdid qilingani va uning qarshiligiga qaramay, og‘ziga noma’lum jism solingani aytilmoqda. Bola ushbu jismni yutib yuborgan.
5-sentabr kuni o‘quvchining sog‘lig‘i yomonlashib, qorin qismidagi kuchli og‘riq sabab shifoxonaga yotqizilgan. Tibbiy tekshiruvlar davomida uning ichki a’zolari qismida yot jism aniqlanib, shoshilinch operatsiya orqali olib tashlangan.
Hozirda bolaning ahvoli qoniqarli ekani va unga zarur tibbiy muolajalar ko‘rsatilayotgani ma’lum qilindi.
Mazkur holat yuzasidan tuman Ichki ishlar bo‘limi tomonidan tergovga qadar tekshiruv olib borilmoqda.
Bolalar ombudsmani bolaning buzilgan huquqlarini tiklash hamda ta’lim muassasasida bolalar xavfsizligini ta’minlash nuqtai nazaridan holatni kuzatib bormoqda. Ombudsman kotibiyati xodimlari vaziyatni joyiga chiqqan holda o‘rganmoqda.
Holat yuzasidan qo‘shimcha ma’lumot berilishi bildirilgan.
