Ijtimoiy reyestrdan chiqarish kambag‘allik qisqarganini anglatmaydi — Ijtimoiy himoya agentligi
Agentlik Ijtimoiy reyestrdan fuqarolarni chiqarish bilan bog‘liq holatlarga izoh berdi.
Ijtimoiy tarmoqlarda fuqarolarni Ijtimoiy reyestrdan chiqarish bilan bog‘liq holatlar yuzasidan turli fikrlar bildirilmoqda. Ijtimoiy himoya milliy agentligi ushbu masala bo‘yicha rasmiy munosabat bildirdi.
Agentlik ma’lumotiga ko‘ra, hududlarda kambag‘allikni qisqartirish, oilalar daromadini oshirish va ularni barqaror daromad manbai bilan ta’minlash bo‘yicha tizimli ishlar olib borilmoqda.
Shu bilan birga, oilani Ijtimoiy reyestrdan chiqarishning o‘zi kambag‘allik qisqarganini anglatmaydi. Ijtimoiy reyestrning asosiy maqsadi ehtiyojmand aholini aniqlash, ularni ijtimoiy himoya bilan qamrab olish hamda zarur yordam va xizmatlarni ko‘rsatishdan iborat.
Agentlik ta’kidlashicha, reyestrdan chiqarish oilaning ijtimoiy-iqtisodiy holati amalda yaxshilangani va belgilangan mezonlarga javob bergani asosida amalga oshirilishi kerak. Bu jarayon ma’lum ko‘rsatkich yoki rejani bajarish maqsadida olib borilmasligi lozim.
Hududdagi kambag‘allik darajasi esa Jahon banki metodologiyasi asosida belgilangan standartlar bo‘yicha o‘tkaziladigan so‘rovlar natijalariga ko‘ra aniqlanadi.
Shuningdek, Ijtimoiy himoya milliy agentligi huzuridagi Ijtimoiy himoya inspeksiyasi tomonidan reyestrdan chiqarilgan oilalar bo‘yicha nazorat ishlari olib borilmoqda. Jarayonda qabul qilingan qarorlarning belgilangan mezon va tartiblarga muvofiqligi o‘rganilmoqda.
Agentlikning qayd etishicha, asosiy maqsad fuqarolarni reyestrdan chiqarish emas, oilalarni haqiqatan ham kambag‘allikdan chiqarish va ehtiyojmand fuqarolarning ijtimoiy himoyaga bo‘lgan huquqlarini ta’minlashdan iborat.
