Qashqadaryo va Jizzaxdagi ikki cho‘qqiga rasmiy nom berildi
O‘zbekistondagi 124 ta tog‘ tizmasi, cho‘qqi, dovon, dara va g‘orning nomlari qayta ko‘rib chiqildi.
O‘zbekistonda ilgari rasman nomsiz bo‘lgan ikkita tog‘ cho‘qqisiga “Muzqoya” va “Qirqqiz” nomlari berildi. Shuningdek, mamlakat bo‘ylab 124 ta geografik obyektning nomlari davlat tili me’yorlariga muvofiqlashtirildi.
Bu haqda O‘zbekiston Respublikasi Vazirlar Mahkamasining 2026-yil 9-iyuldagi 376-son qarorida belgilangan.
Qarorga muvofiq, respublika hududidagi tog‘ tizmalari, cho‘qqilar, dovonlar, daralar va g‘orlarning nomlari qayta ko‘rib chiqildi. Jami 124 ta geografik obyektning nomlari o‘zgartirildi yoki tuzatildi. Ularning 117 tasi tog‘ tizmalari, cho‘qqilar va dovonlar, qolganlari esa daralar va g‘orlardan iborat.
Yangi nom berilgan obyektlardan biri Qashqadaryo viloyatidagi Muzqoya cho‘qqisi bo‘lib, u Hisor davlat tabiat qo‘riqxonasi hududida joylashgan. Cho‘qqining balandligi 4360 metrni tashkil etadi. Nom uning atrofidagi muzliklar mavjudligi bilan bog‘liq.
Shuningdek, Jizzax viloyatidagi Qirqqiz cho‘qqisiga ham rasmiy nom berildi.
Hududlar kesimida Andijonda 1 ta, Buxoroda 12 ta, Farg‘onada 10 ta, Jizzaxda 54 ta, Namanganda 5 ta, Navoiyda 12 ta, Qashqadaryoda 11 ta, Samarqandda 6 ta, Surxondaryoda 4 ta va Toshkentda 8 ta geografik obyektning nomlari tasdiqlandi.
Islohotlar doirasida ayrim geografik nomlar lotin yozuviga asoslangan o‘zbek alifbosi va davlat tili me’yorlariga moslashtirildi. Jumladan, Jizzaxdagi Qizilturuk tog‘ tizmasi Qizilto‘riq, Navoiydagi Arystantov tog‘ tizmasi Arslontov, Qashqadaryodagi “Tamerlan g‘ori” esa Amir Temur g‘ori deb belgilandi.
Tasdiqlangan geografik nomlardan xaritalar, ma’lumotlar bazalari va rasmiy ish yuritishda foydalanish majburiy bo‘ladi. Tegishli davlat tashkilotlariga ikki oy muddatda xaritalar va ma’lumotlar bazalariga o‘zgartirishlar kiritish vazifasi yuklatilgan.
