Sudyalikka nomzodlar uchun yosh talabi 30 yoshga tushirilishi mumkin
Shuningdek, sudyani dastlab besh yil muddatga, keyinchalik muddatsiz tayinlash tartibini joriy etilish taklif qilindi.
Sudyalik lavozimiga nomzodlar va xalq maslahatchilari uchun belgilangan yosh chegarasini 35 yoshdan 30 yoshga tushirish taklif qilinmoqda.
“Sudyalarning maqomi to‘g‘risida”gi qonun lohiyasi bilan sudyalik lavozimiga nomzodlarga qo‘yiladigan ayrim talablarni qayta ko‘rib chiqish nazarda tutilgan. Jumladan, sudyalar va xalq maslahatchilari uchun yosh chegarasini 30 yosh etib belgilash taklif qilinmoqda.
Shuningdek, sudyani dastlab besh yil muddatga, keyinchalik esa muddatsiz davrga tayinlash tartibini joriy etish rejalashtirilgan. Sudya, sud raisi va rais o‘rinbosari lavozimlariga qo‘yiladigan talablarni kuchaytirish ham ko‘zda tutilmoqda.
Loyihada sudyalar va ularning oila a’zolarini ijtimoiy himoya qilishga qaratilgan qator normalar ham nazarda tutilgan.
Bundan tashqari, milliy qonunchilikka “iste’fodagi sudya” institutini joriy etish taklif qilinmoqda. Bunday sudyalarga boshqa huquqlar qatori professional mediatorlik faoliyati bilan shug‘ullanish imkoniyati berilishi mumkin.
Qonun loyihasida Oliy sud va quyi sudlar apparatlari faoliyatini samarali tashkil etishga qaratilgan boshqa qator normalar ham o‘rin olgan.
