Xorijda ota-ona qaramog‘isiz qolgan 11 nafar bola O‘zbekistonga qaytarildi
Ularning 9 nafari Rossiya, 2 nafari Qozog‘istondan olib kelingan.
Xorijiy davlatlarda ota-ona qaramog‘isiz qolgan 11 nafar voyaga yetmagan bola O‘zbekistonga qaytarildi. Bu haqda Ijtimoiy himoya agentligi matbuot xizmati ma’lum qildi.
Qayd etilishicha, o‘tgan hafta davomida olib borilgan ishlar natijasida 9 nafar bola Rossiya Federatsiyasidan, 2 nafar bola esa Qozog‘iston Respublikasidan Vatanga olib kelingan.
Voyaga yetmaganlarni O‘zbekistonga qaytarish ishlari Ichki ishlar vazirligi, Sog‘liqni saqlash vazirligi hamda Prezident huzuridagi Ijtimoiy himoya milliy agentligi xodimlaridan iborat ishchi guruh tomonidan amalga oshirilgan.
Mazkur jarayonda Oliy Majlisning Bola huquqlari bo‘yicha vakili — Bolalar ombudsmani ko‘magida xorijiy davlatlarning vakolatli organlari bilan hamkorlik qilingan.
Vatanga qaytarilgan bolalarning huquq va qonuniy manfaatlarini ta’minlash, ularni oilaviy muhitga qaytarish hamda zarur ijtimoiy xizmat va yordamlar bilan qamrab olish bo‘yicha tegishli choralar ko‘rilmoqda.
Bolalarning keyingi holati va oilaga moslashuvi yashash manzili bo‘yicha “Inson” ijtimoiy xizmatlar markazlari tomonidan ijtimoiy hamrohlik asosida kuzatib boriladi.
