Isroil Hizbulloh bazasini portlatdi: portlash 4,1 magnitudali zilzilaga sabab bo‘ldi
2 kilometrdan ortiq uzunlikdagi ikkita tunnelni yo‘q qilish uchun 1 ming tonnadan ortiq portlovchi modda ishlatilgan.
Isroil harbiylari Livanning janubida Hizbulloh tomonidan foydalanilgan yirik yerosti majmuasi yo‘q qilinganini ma’lum qildi.
Isroil tomoni majmuani yo‘q qilish uchun 1 ming tonnadan ortiq portlovchi modda ishlatilganini aytdi. Portlash Ali Tohir tizmasi ostidan o‘tgan, umumiy uzunligi 2 kilometrdan ortiq bo‘lgan ikkita tunnelni vayron qilgan.
AQSh Geologiya xizmati ma’lumotlariga ko‘ra, portlash magnitudasi 4,1 balli zilzilaga teng seysmik faollikni yuzaga keltirgan. Hizbulloh yoki Livan hukumatidan hozircha hodisa yuzasidan rasmiy munosabat bildirilmagan.
Isroil kuchlari bir necha oy davom etgan janglardan so‘ng o‘tgan hafta Eron tomonidan qo‘llab-quvvatlanadigan guruh nazoratidagi tizma ustidan nazoratni o‘rnatgan. Isroil harbiylari mart oyida Hizbulloh bilan mojaro qayta boshlanganidan keyin egallangan Livan janubining katta qismini hamon nazorat qilmoqda.
Isroil Mudofaa kuchlari (IDF) e’lon qilgan suratlarda osmonni yoritgan ulkan olov sharini ko‘rish mumkin.
“Osmon yorishdi va taxminan 15 soniyadan keyin dahshatli ovozni eshitdik”, — dedi tizma hududidan taxminan 6 kilometr g‘arbda joylashgan Nabatiya shahrida yashovchi Ahamed BBC telekanaliga. “Uy xuddi zilzila bo‘lgandek butunlay silkindi”, — dedi u.
Uning aytishicha, odamlar qichqirgan, bolalar yig‘lagan, avtomobillar esa yo‘llarni to‘ldirib, odamlar hududni tark etib Bayrut tomon yo‘l olgan. Zilzila tebranishlari shimoldan 40 kilometr uzoqlikdagi sohilbo‘yi Sayda shahrida ham sezilgan.
IDF ma’lumotlariga ko‘ra, yerosti infratuzilmasi Hizbullohning “Badr” bo‘linmasi tomonidan foydalanilgan qo‘mondonlik markazini o‘z ichiga olgan. Majmuada o‘nlab raketa, snaryad va uchuvchisiz uchish apparatlari, shuningdek, tankka qarshi qurollar, minalar va portlovchi moddalar saqlangan.
“Bu yigirma yildan ortiq vaqt davomida qurilgan, Eron terror rejimi tomonidan moliyalashtirilgan va rejalashtirilgan strategik infratuzilma edi”, — deyiladi IDF'ning Telegram’dagi bayonotida.
IDF ma’lumotiga ko‘ra, majmua ichida bo‘lgan barcha jangarilar yo‘q qilingan yoki hududni tark etgan.
Isroil harbiylari majmuaning yo‘q qilinishi hududdagi sakkizta tunnelni tugatish va “xavfsizlik zonasi” tashkil etish bo‘yicha missiya yakunlanganini bildirgan.
So‘nggi operatsiya Livan janubida janglar qayta kuchaygan bir paytda amalga oshirildi. Isroil kuchlari Hizbulloh pozitsiyalariga qarshi amaliyotlarni kengaytirgan va chegara yaqinida Isroil “xavfsizlik zonasi” deb atayotgan hududni nazorat qilishda davom etmoqda.
Livan OAVlari payshanba kuni mamlakat janubining boshqa hududlariga ham yangi Isroil zarbalari berilgani haqida xabar berdi. Jumladan, Nabatiya al-Favqa va Tir okrugidagi Mansuriy shaharchalariga zarbalar berilgani qayd etildi.
Livan armiyasi Isroil nazorat qilmaydigan hududlarda, jumladan, janubdagi Nabatiya shahrida o‘z kuchlarini ko‘paytirdi. Mahalliy "MTV" telekanali xabariga ko‘ra, bu choralar barqarorlikni mustahkamlash va aholiga xavfsizlikni ta’minlashga qaratilgan.
Livan 2-mart kuni Isroil, AQSh va Eron o‘rtasidagi urushga tortildi. O‘sha kuni Hizbulloh Eron oliy rahbarini o‘ldirgan zarbaga javoban Isroil hududiga raketalar uchirgan.
Bunga javoban Isroil Livan bo‘ylab bombardimon kampaniyasini boshladi va mamlakat janubining katta qismiga bostirib kirdi. Isroil kuchlari hozir ham Livan hududining qariyb 5 foizini nazorat qilmoqda.
Iyun oyida Eron va AQSh o‘rtasida sulh bitimi tuzilishi hamda Livan va Isroil o‘rtasida alohida kelishuvga erishilishi ortidan janglar kamaydi.
BMT ma’lumotiga ko‘ra, Livanda qariyb 330 ming kishi mojaro sabab o‘z uylarini tark etgan. Isroil harbiylarining faoliyati, havo hujumlari, vayronagarchiliklar va Isroil bosib olgan hududlarga qaytishdagi cheklovlar sabab ko‘plab odamlar uylariga qayta olmayapti.
Livan va Isroil o‘rtasidagi kelishuv doirasida Hizbulloh qurolsizlanishi, Isroil kuchlari Livanning janubidan bosqichma-bosqich chiqib ketishi va Livan armiyasi hudud bo‘ylab joylashtirilishi kutilmoqda.
Hizbulloh kelishuvda bevosita ishtirok etmagan va to‘g‘ridan-to‘g‘ri muzokaralarni rad etgan. Janglar kamayganiga qaramay, Livan janubida Isroilning zarbalari va vayron qilish ishlari davom etmoqda.
Livan Sog‘liqni saqlash vazirligi ma’lumotlariga ko‘ra, 2-martdan beri Isroil hujumlari oqibatida kamida 4 383 kishi, jumladan, 395 ayol va 259 bola halok bo‘lgan. Vazirlik ma’lumotlarida halok bo‘lganlar orasidagi jangarilar va tinch aholi alohida ajratilmagan. Vazirlikning bildirishicha, shu haftaning o‘zida kamida 29 kishi halok bo‘lgan.
Isroil rasmiylari ayni davrda 40 nafar isroillik harbiy va 4 nafar fuqaro halok bo‘lganini ma’lum qilgan.
