Qozog‘istonlik futbolchilar zaharlanishi: holat yuzasidan jinoyat ishi qo'z'atildi
Mehmonxonada nonushta qilgan 20 kishidan 13 nafarida zaharlanish alomatlari kuzatilgan.
Toshkentda Qozog‘istonning Qarag‘andi shahridan kelgan “Dostlik Cup 2026” xalqaro futbol festivali ishtirokchilari orasida oziq-ovqatdan zaharlanish holati qayd etilgan edi. Dastlabki xabarlarda jabrlanganlarning 11 nafari bola, 6 nafari katta yoshli kishi ekani aytilgan.
Bosh prokuratura ma’lum qilishicha, 2026-yil 1-noyabr kuni futbol musobaqasida ishtirok etish uchun Qozog‘istondan O‘zbekistonga kelgan 20 nafar bola va ularning yaqinlari Toshkent shahridagi mehmonxonada nonushta vaqtida yarim pishgan tuxum va sosiska iste’mol qilgan.
Shu kunning o‘zida ulardan 13 nafarida qayt qilish, ich ketishi, qorin og‘rig‘i va tana haroratining ko‘tarilishi kabi alomatlar kuzatilgan.
Shundan so‘ng ular tez tibbiy yordam xizmati orqali Respublika ixtisoslashtirilgan epidemiologiya, mikrobiologiya, yuqumli va parazitar kasalliklar ilmiy-amaliy tibbiyot markaziga olib borilgan.
Mazkur holat yuzasidan Chilonzor tumani prokuraturasi tomonidan Jinoyat kodeksining 276¹³-moddasi (sanitariya qonunchiligini yoki epidemiyaga qarshi kurash qoidalarini buzish) bilan jinoyat ishi qo‘zg‘atilgan.
Hozirda Chilonzor tumani IIO FMB huzuridagi tergov bo‘limi tomonidan dastlabki tergov harakatlari olib borilmoqda.
