Saudiya Arabistoniga hujum: muhim neft quvuri yopildi
Ushbu quvur Hormuz bo‘g‘ozidagi neft eksporti bilan bog‘liq uzilishlar sharoitida muhim muqobil yo‘nalish hisoblanadi.
Saudiya Arabistoni hududidagi muhim Sharq-G‘arb neft quvuriga dronlar hujumi uyushtirilgach, quvur vaqtincha yopildi. Hujum Iroq hududidan amalga oshirilgani aytilmoqda.
1200 kilometr uzunlikdagi quvur mamlakat sharqidagi Abqayq neft konini Qizil dengiz bo‘yidagi Yanbu porti bilan bog‘laydi. Saudiya Arabistoni Energetika vazirligi quvurni ehtiyot chorasi sifatida yopganini ma’lum qildi.
Saudiya Tashqi ishlar vazirligi hujum oqibatida jarohatlanganlar borligini va zarar yetganini bildirdi. Hozircha hujum uchun hech bir guruh javobgarlikni o‘z zimmasiga olmagan.
Iroq hukumati hujumni qoralab, o‘z hududidan boshqa davlatlarga qarshi hujumlar uyushtirish uchun foydalanilishiga yo‘l qo‘ymasligini bildirdi. Iroq bosh vaziri Maysan viloyatidagi xavfsizlik operatsiyalari qo‘mondonligi faoliyatini tekshirishni buyurgan, qo‘mondonni lavozimidan ozod qilgan. Shuningdek, Iroq Eron bilan chegaradagi Shalamcheh chegara o‘tish punktini vaqtincha yopgan.
Ar- Riyod Iroq bosh vazirining iltimosiga ko‘ra, «hozircha» javob qaytarmasligini bildirgan, biroq o‘z manfaatlarini himoya qilish uchun barcha zarur choralarni ko‘rish huquqini saqlab qolgan.
Sharq-G‘arb quvuri Saudiya Arabistoni uchun strategik ahamiyatga ega. U so‘nggi oylarda kuniga 4–5 million barrel neft tashigan bo‘lib, bu jahon neft ta’minotining qariyb 4–5 foiziga teng.
Quvur ayniqsa Hormuz bo‘g‘ozidagi neft eksporti bilan bog‘liq uzilishlar sharoitida muhim muqobil yo‘nalish hisoblanadi. Uning yopilishi global energetika bozoriga qo‘shimcha bosim qilishi va neft narxlarining oshishiga olib kelishi mumkin.
Tahlilchilarga ko‘ra, Saudiya Arabistonining quvur yopilishi sabab yuzaga kelgan neft eksportidagi yo‘qotishlarni tezda qoplay oladigan muqobil imkoniyatlari cheklangan. Mamlakat neftning bir qismini Misr orqali, Suvaysh kanali yoki SUMED quvuri orqali eksport qilishga urinishi mumkin.
