Ovqatdan zaharlanish gumoni: Farg‘onada 31 kishi shifoxonaga yotqizildi
Gumon qilinayotgan oziq-ovqat mahsulotlari va bemorlardan tegishli namunalar olinib, laboratoriya tekshiruvlariga yuborilgan.
Farg‘ona viloyati Uchko‘prik tumanida 37 nafar fuqaro holsizlik, ko‘ngil aynishi va ich ketishi kabi shikoyatlar bilan tibbiyot muassasasiga murojaat qilgan. Ulardan 31 nafari shifoxonaga yotqizilgan.
Ma’lum qilinishicha, dastlabki epidemiologik surishtiruv davomida 17–18-sentyabr kunlari murojaat qilgan fuqarolar Uchko‘prik tumanidagi Navro‘zshoh ko‘chasida joylashgan fast-food shoxobchalaridan birida xot-dog va non-burger iste’mol qilgani aniqlangan. Shifokorlar bemorlarda ovqatdan zaharlanish holati borligidan gumon qilgan.
18-sentyabr soat 17:00 holatiga ko‘ra, jami 37 kishi tibbiy yordam so‘rab murojaat qilgan, 31 nafari shifoxonaga yotqizilgan. Hozirda ularga tibbiy yordam ko‘rsatilmoqda.
Holat yuzasidan epidemiologik surishtiruv ishlari olib borilmoqda. Gumon qilinayotgan oziq-ovqat mahsulotlari va bemorlardan tegishli namunalar olinib, laboratoriya tekshiruvlariga yuborilgan.
Shuningdek, mazkur tadbirkorlik subyektining faoliyati qonunchilikda belgilangan tartibda vaqtincha to‘xtatilgan.
