«Sharq-G‘arb» neft quvuri yopiq: Saudiya Arabistoni Yevropaga neft yetkazib berishni vaqtincha to‘xtatadi
Mazkur holat ayrim mijozlarni muqobil yetkazib berish manbalarini izlashga undagan.
Saudi Aramco kompaniyasi kamida ikkita Yevropa neftni qayta ishlash zavodiga kelasi oy Saudiya nefti yetkazib berilmasligini ma’lum qilgan. Bunga mamlakatning Qizil dengizga olib boruvchi muhim neft quvuriga qilingan dron hujumi sabab bo‘lgan.
Bloomberg manbalariga ko‘ra, Saudiya neftini uzoq muddatli shartnomalar asosida muntazam oladigan Yevropadagi barcha xaridorlarga kelasi oy yetkazib berish amalga oshirilmaydi.
Ma’lum qilinishicha, Saudiya Arabistoni o‘tgan hafta dronlar hujumi ortidan «Sharq-G‘arb» neft quvurini yopgan. Manba quvur faoliyati bir necha kun ichida qisman tiklanishi, to‘liq ishga tushishi esa olti haftagacha vaqt olishi mumkinligini bildirgan.
Yevropadagi neftni qayta ishlash zavodlari Saudiya neftini asosan Misrning Sidi-Kerir porti orqali oladi. Mazkur port Qizil dengiz bilan neft quvuri orqali bog‘langan.
Neft quvurining to‘xtatilishi ayrim Aramco mijozlarini muqobil yetkazib berish manbalarini izlashga undagan. Xususan, Polshaning Orlen kompaniyasi juma kunidan buyon neft yetkazib berish bo‘yicha o‘ndan ortiq tender e’lon qilgan.
