Ichkaridan tuzilgan reja barbod bo‘ldi: Toshkentda o‘quv markazini tunamoqchi bo‘lgan uch kishi ushlandi
Sobiq qo‘riqchi ikki sherigi bilan avval ishlagan o‘quv markaziga bosqinchilik qilishni rejalashtirgan.
Toshkent shahridagi o‘quv markazlaridan birida saqlanayotgan katta miqdordagi pulni bosqinchilik yo‘li bilan qo‘lga kiritishni rejalashtirgan uch nafar shaxs qo‘lga olindi.
Toshkent shahar Ichki ishlar bosh boshqarmasi va Davlat xavfsizlik xizmati tezkor xodimlari tomonidan o‘tkazilgan tadbirlar davomida jinoyat rejasining tashkilotchisi 1995-yilda tug‘ilgan, avval mazkur o‘quv markazida qo‘riqchi bo‘lib ishlagan shaxs ekani aniqlangan.
Guruh a’zolari o‘zaro vazifalarni taqsimlab olgan. Sobiq qo‘riqchi markaz ichidagi vaziyatni o‘rganib, pul saqlanadigan joy haqida sheriklariga ma’lumot berishi, boshqa ishtirokchi esa elektr ta’minotini uzishi kerak bo‘lgan.
Rejaga ko‘ra, niqob taqqan guruh a’zolari binoga kirib, pullarni qoplarga joylashtirishi va ijaraga olingan avtomobilda olib chiqib ketishi lozim edi. Ulardan biri jinoyatni yashirish va guvohlarni chalg‘itish maqsadida ayollar kiyimida bo‘lishni ham rejalashtirgan.
Shuningdek, ular o‘g‘irlangan pullarni qo‘lga kiritgach, Farg‘ona viloyati orqali qo‘shni respublikalardan biriga chiqib ketishni mo‘ljallagan.
Biroq huquqni muhofaza qiluvchi organlar xodimlari jinoyatning oldini olib, guruh a’zolarini qo‘lga oldi.
Tezkor tadbir davomida jinoyat uchun tayyorlangan niqoblar, bolg‘a, qoplar, qo‘lqoplar, ratsiyalar, eshiklarni ochishga mo‘ljallangan maxsus moslamalar, kalit nusxalari hamda xorijga chiqish pasporti ashyoviy dalil sifatida rasmiylashtirilgan.
Mazkur holat yuzasidan tergov boshqarmasi tomonidan O‘zbekiston Respublikasi Jinoyat kodeksining 164-moddasi 2-qismi «a» va «b» bandlari bilan jinoyat ishi qo‘zg‘atilgan. Gumonlanuvchilarga nisbatan qamoqqa olish tarzidagi ehtiyot chorasi qo‘llanilgan. Hozirda dastlabki tergov harakatlari olib borilmoqda.
