QR-kodsiz avtomobil berilmaydi: Evakuatorga yuklangan mashinani qaytarib olish qiyinlashadi
Toshkentda avtomobillarni evakuatsiya qilish va jarima maydonlarida saqlash tartibi o‘zgaradi.
24-dekabrdan boshlab Toshkentda avtomobillarni evakuator orqali olib ketish va jarima maydonlarida saqlash jarayoni yangi qoidalar asosida tashkil etiladi. Butun jarayon, avtomobilni yuklashdan tortib egasiga qaytarishgacha, yagona elektron tizim orqali amalga oshiriladi.
Bu haqda Markaziy yo‘l harakatini boshqarish markazi (TsODD) matbuot xizmati ma’lum qildi.
Yangi qoidalarga ko‘ra, haydovchi avtomobilni evakuatorga yuklash boshlanishidan oldin yetib kelib, qoidabuzarlikni bartaraf etsa, transport vositasi jarima maydoniga olib ketilmaydi. Biroq yuklash jarayoni boshlanganidan keyin avtomobilni olib ketishni to‘xtatish mumkin bo‘lmaydi.
Shuningdek, avtomobilni saqlash uchun to‘lov yuklash boshlangan vaqtdan e’tiboran har bir sutka uchun hisoblanadi. Transport vositasi egasiga faqat elektron tizim orqali shakllantirilgan QR-kodli ruxsatnoma asosida topshiriladi.
Agar avtomobil olti oy davomida jarima maydonidan olib ketilmasa, uni saqlash bilan bog‘liq qarzdorlik majburiy undiriladi. 12 oy o‘tgach esa sud transport vositasini egasiz deb topishi mumkin.
Evakuatsiya va saqlash narxlari
Toshkentda avtomobilni olib ketish xizmati uchun bir kilometrga 88 ming so‘mgacha, biroq jami 1 mln 760 ming so‘mdan oshmaydigan miqdorda haq belgilangan.
Jarima maydonida saqlash narxi esa bir sutka uchun 88 ming so‘mgacha bo‘ladi.
Masalan, avtomobilni 3 kilometr masofaga olib ketish va jarima maydonida 3 sutka saqlash uchun jami 528 ming so‘mgacha to‘lov talab etilishi mumkin. Bu summaga yo‘l harakati qoidabuzarligi uchun belgilangan jarima kirmaydi.
